ОБВИНИТЕЛСТВОТО ЗАТВОРИ ОЧИ ПРЕД ПЛАНИРАНИ ГРАБНУВАЊА Туфегџиќ обвинува за дефокус и селективна истрага

Адвокатот Владимир Туфегџиќ изрази остри критики кон Обвинителството, обвинувајќи го дека не реагирало на сведочењата на дел од обвинетите во случајот за убиствата на Вања Ѓорчевска и Панче Жежовски.

Според Туфегџиќ, сведочењата укажуваат дека грабнувањата и убиствата се планирале многу пред реализацијата на овие две трагедии, но надлежните органи не презеле ништо.

Во однос на обвинетиот Александар Ѓорчески, татко на убиената Вања, Туфегџиќ посочува дека неговата невиност се потврдува и преку исказот на обвинетиот Влатко Кешишев.

– И со исказот на Кешишев, кој рече дека за таткото првпат чул во притвор, се докажува дека тој нема никаква вина – изјави адвокатот.

Туфегџиќ истакна дека постои сведочење од уште еден сведок, кој укажал на тоа дека уште една година пред убиствата во Скопје и во Велес, се подготвувале грабнувања на луѓе.

„Се подготвувале активности кои сите нас треба да нè загрижат. Наместо Јавното обвинителство да тргне во таа насока, ја дефокусираа истрагата со неоснованото обвинување на Александар. Тоа е резултат на непостоење на унифицирани стандарди за постапување во ваков случај – нагласи Туфегџиќ.

Дополнително, тој ја обвини институцијата дека не реагирала ни по неговите пријави поврзани со објавување на докази од истрагата во странски држави, алудирајќи на српскиот политичар Срѓан Ного.

– Обвинителството не постапи ни по пријавите за тортура, ни по известувањето за објавување на дел од доказниот материјал од странска држава. Не добивме одговори на многу прашања. Се надевам дека ќе преземат нешто – рече Туфегџиќ.