„БУЛМАК 2016“ ТВРДИ ДЕКА НЕМА ЗАГАДУВАЊЕ НА КРИВА РЕКА Цијанидот е за пет пати помалку од дозволениот, велат од компанијата
Согласно земените мостри вода од Тораничка Река на 14 март, параметрите укажуваат дека нивото на цијанид е пониско од граничните вредности за води од трета класа како што е Тораничка Река, велат од „Булмак 2016“.
Компанијата „Булмак 2016“ одржа прес-конференција на која беа презентирани лабораториските наоди од анализата на водата земена по дефектот на водоводната цевка на 14 март 2025 година. Според добиените резултати, истекувањето на јамска вода во Тораничка Река не предизвикало загадување ниту еколошка катастрофа, како што беше сугерирано во јавноста.
На конференцијата зборуваа директорот на „Булмак 2016“ Тони Тоневски, директорот на рудникот „Тораница“ Антонио Антовски и инженерот за животна средина Љупчо Георгиевски. Тие истакнаа дека компанијата строго ги почитувала сите протоколи и процедури предвидени во „А“- Интегрираната еколошка дозвола, која е во сила до јуни 2026 година.
– Веднаш по дефектот, преземени се сите неопходни мерки, информиран е Државниот инспекторат за животна средина, а протокот на јамската вода е сопрен. Истечената количина од околу 300 кубни метри вода е од трета категорија и не содржи хемиски загадувачи – нагласија од компанијата.
Лабораториските анализи на акредитираната лабораторија „Еуромак Контрол“ покажале дека нивото на цијанид е далеку под дозволените граници, а присуството на тешки метали како арсен, никел, манган, железо и жива е во рамки на безбедните вредности. Единствено, вредноста на олово била 52,8 микрограми на литар, нешто над дозволената граница за води од трета класа, но, како што беше појаснето, тоа е природна карактеристика на водите во регионот.
Дополнителни мерења направени на 26 март 2025 година покажале дека водите од Тораничка Река и Крива Река се во рамки на предвидените стандарди, со исклучок на мало зголемување на кадмиум, кој, како што посочија од компанијата, не е поврзан со работењето на рудникот.
Од „Булмак 2016“ категорично демантираат дека нивното работење придонело за загадување на Крива Река и посочуваат дека досега не е констатиран помор на риби.
– Потврдуваме дека ниту еден наш работник не е одговорен за настанатиот дефект. Граѓаните можат да бидат спокојни, нема никаква опасност по нивното здравје – истакнаа од компанијата.
Компанијата упати апел до надлежните институции да ги утврдат вистинските причинители за евентуалната еколошка состојба во регионот, доколку таа навистина постои. „Булмак 2016“ останува отворена за соработка и дополнителни информации за јавноста.