БЕЛАТА КУЌА ПРАВИ ПЛАНОВИ ЗА ЗАОБИКОЛУВАЊЕ НА КОНГРЕСОТ Ако не успее, тука е „Мистер Вето“

Белата куќа помина месеци подготвувајќи се за евентуално преземање на Конгресот од страна на демократите, развивајќи планови за продолжување на унапредувањето на големите делови од неговата агенда преку извршната власт, додека се подготвува за истраги на нејзината администрација, тврдат за Ројтерс претставници на Белата куќа запознаени со плановите, кои зборувале под услови на анонимност.

Високи функционери, вклучувајќи го заменик-шефот на кабинетот Стивен Милер и директорот за буџет Расел Воут соработуваат со Канцеларијата на советникот на Белата куќа од април за да идентификуваат извршни мерки за имиграцијата, царините, трошоците за домување и федералните трошоци што Трамп би можел да ги преземе без одобрение од Конгресот.

– Советници на Трамп разгледуваат што Трамп законски може да направи сам, каде би можел да ги помести границите на своите овластувања и како да ги брани тие одлуки на суд – вели функционер на Белата куќа, под услови на анонимност.

Преземањето на контролата врз Конгресот би им дало на демократите моќ да вршат истраги за Трамп, да го блокираат законодавството и да ги ограничат неговите приоритети за трошење. Но, Трамп би задржал широка извршна власт над трговијата, надворешната политика и федералната бирократија што веќе ја користеше агресивно за време на неговиот втор мандат.

Доколку републиканците ја изгубат контролата врз Конгресот, Трамп рече дека очекува да стави вето „на еден или два месеца“ пред да постигне компромиси со демократите.

– Претпоставувам дека ќе станам „г-дин вето“, а потоа, во одреден момент, веројатно ќе склучиме договори – изјави Трамп за подкаст на „Њујорк пост“ објавен во неделата.

На демократите им е потребно да добијат по четири места повеќе во Претставничкиот дом, како и во Сенатот за да го преземат мнозинството од републиканците, кое изнесува 218-214 во Конгресот и 53-47 во Сенатот. Анкетите на јавното мислење им се во прилог на демократите да го освојат Претставничкиот дом, додека за Сенатот е потешко да се процени резултатот.

Во текот на изминатиот месец, Трамп одржа митинзи низ целата земја обидувајќи се да ја зачува републиканската контрола врз Конгресот, дури и додека неговите помошници приватно се подготвуваат за многу поинаков политички исход од изборите на 3 ноември.

Федералните агенции поднесоа предлози и правни прегледи на мерките што администрацијата би можела да ги преземе еднострано, изјави еден од луѓето запознаени со плановите.

Меѓу извршните мерки што се разгледуваат се нови тарифи за увоз на критични минерали и ветерни турбини, построги правила за визи за меѓународни студенти и привремени странски работници и мерки насочени кон намалување на трошоците за домување и градежништво, изјави претставникот на Белата куќа.

Трамп е информиран за подготовките и учествувал во дискусиите за нив, изјави претставник на Белата куќа. На прашање колку удобно би се чувствувал Трамп да владее преку извршна власт под демократски Конгрес, едно од лицата од неговиот кабинет рече: „Многу удобно“.

Трамп веќе го тестираше досегот на претседателската моќ откако се врати на функцијата во јануари 2025 година, користејќи ја извршната власт за да наметне широки тарифи, да го интензивира спроведувањето на имиграциските закони, да го намали федералниот работен капацитет и да ги следи целите на надворешната политика, вклучително и војната против Иран без одобрение од Конгресот или нови закони.

Главен исклучок беше огромниот пакет на Трамп за намалување на даноците и трошоците, кој беше усвоен од Конгресот контролиран од републиканците и потпишан во закон од претседателот во јули 2025 година.

– Претседателот Трамп во последните две години во основа го игнорираше Конгресот и се обиде да направи што е можно повеќе преку извршни наредби и извршна власт. Мислам дека тоа ќе продолжи дуеи и ако има демократско мнозинство – ​​рече Натан Гонзалес, уредник во „Инсајд елекшнс“.

Трамп постојано повикуваше на национални вонредни состојби за да ја прошири својата способност да дејствува без ново законодавство. Конгресот може да гласа за прекин на тие вонредни состојби, но Трамп би можел да стави вето на таков потег, барајќи двотретинско мнозинство во двата дома за да го поништи.

Контролата врз Сенатот би им овозможила на демократите да ги блокираат номинираните на Трамп за судска и извршна власт, вклучително и секој избор за Врховниот суд.

– Претпоставувам дека тие ќе бидат многу неподготвени да одобрат кое било од назначувањата на претседателот – вели Ендру Буш, професор по јавна политика на Универзитетот во Тенеси, Ноксвил, и автор на „Историја на среднорочните избори“.

Демократите би можеле да одбијат да донесат закон поддржан од Трамп. Но, Трамп би можел да стави вето на демократскиот закон што не му се допаѓа, а демократите веројатно нема да имаат доволно гласови во Претставничкиот дом за да го поништат.

Судовите би можеле да блокираат извршни дејствија што ги надминуваат законските овластувања на Трамп. Белата куќа планира да побара правни мислења од Министерството за правда за да утврди што може да направи Трамп без Конгресот и како да ги брани тие дејствија ако бидат оспорени на суд, рече еден од луѓето.

Сепак, еден предизвик не може да се избегне преку одлуки на извршната власт, а тоа се конгресните истраги.

Ројтерс претходно објави дека високи демократи во Претставничкиот дом и помошници на комисиите разговарале за користење на сослушувања, судски покани и барања за документи за да испитаат дали Трамп ја искористил својата претседателска моќ за да има корист за себе, за сојузниците или донаторите.

– Помошниците на Трамп се подготвуваат за таа можност со месеци. Адвокатите на Белата куќа ги информираат политички назначените лица и раководителите на агенциите за тоа како да се справат со конгресните истраги, со барањата за пристап до документи и со судските покани– велат изворите во белата куќа.