ЉУБОВНАТА ПРИКАЗНА НА ЕДЕН ОД НАЈПЛАТЕНИТЕ ФУДБАЛЕРИ ВО СВЕТОТ Хари Кејн ја освои „Златната топка“, а најголемата поддршка ја има од сопругата Кејти
Хари Кејн ѝ се заблагодари на сопругата Кејти по освојувањето на „Златната топка“. Нивната љубов започнала уште во детството, а денес имаат четири деца.
Англискиот фудбалер Хари Кејн ја освои „Златната топка“ за 2026 година, а во емотивниот говор по доделувањето на престижното признание посебно ѝ се заблагодари на сопругата Кејти Гудланд. Нивната љубовна приказна започнала уште во детството, многу пред тој да стане една од најголемите ѕвезди на светскиот фудбал.
– На мојата сопруга Кејти, мојата најдобра пријателка. Секако, поминавме низ подеми и падови. Ти си мојата најголема поддршка. Дури имав чувство дека ти го посакуваше ова повеќе од мене – ѝ порача Кејн од сцената.
Фудбалерот додаде дека знае колку тешко ѝ паднало неизвесното чекање на резултатите и дека ова е успех што треба да го прослават заедно.
– Ова е трофеј што го славиме заедно, не само јас. Ова сме јас и ти, целото семејство и нашиот близок круг луѓе. Ти благодарам, те сакам – рече тој.
Се познаваат уште од четиригодишна возраст
Хари и Кејти се запознале во основното училиште „Ларксвуд“ во Чингфорд, во источен Лондон. И двајцата имале само четири години кога тргнале на училиште, а подоцна продолжиле да се дружат и во средното училиште.
Кејн еднаш открил дека Кејти му била првиот бакнеж, кога имал околу 14 години. Сепак, иако биле блиски пријатели, нивната љубовна врска започнала дури откако го завршиле училиштето.
Фудбалерот во повеќе наврати зборувал за тоа колку му значи што ја запознал сопругата пред да стане славен. Во интервју за „Ивнинг стандард“ во 2017 година објаснил дека, доколку денес запознавал нови луѓе, би му било тешко да знае дали се со него од вистинските причини.
– Имав среќа што ја имам љубовта од детството – рекол тогаш.
View this post on Instagram
Ја побарал за жена на Бахамите
Во јули 2017 година Кејн ја запросил Кејти за време на одморот на Бахамите. Две години подоцна, во јуни 2019 година, се венчале на приватна церемонија.
– Конечно се оженив со мојата најдобра пријателка – напиша фудбалерот по венчавката.
Кејти има диплома по спортски науки од Универзитетот Мидлсекс, а работи како фитнес-инструкторка и тренерка. Иако е сопруга на еден од најпознатите фудбалери во светот, во голема мера го држи својот живот подалеку од медиумското внимание.
Четири деца и живот во Минхен
Хари и Кејти имаат четири деца – ќерките Ајви и Вивиен и синовите Луис и Хенри. Семејството во 2023 година се преселило во Минхен, откако Кејн потпишал договор со „Баерн“.
Фудбалерот често истакнува дека сопругата и децата му помагаат да остане приземен и покрај славата и притисокот што доаѓаат со професионалниот спорт. Кејти била покрај него во текот на неговиот пат од млад играч во Англија до капитен на репрезентацијата и еден од најпознатите напаѓачи во светот.
View this post on Instagram
По освојувањето на „Златната топка“, Кејн им се обрати и на децата, нагласувајќи дека тие се една од главните причини поради кои се труди да биде успешен.
– Сакам да им бидам добар пример како татко, но и како професионалец, и да им покажам што значи да се работи напорно и да се верува во себе – порача тој.
View this post on Instagram