СРБИЈА ИСПРАТИ ПРОТЕСТНА НОТА ДО ХРВАТСКА Белград смета дека Загреб се меша во српските избори

Српското Министерство за надворешни работи испрати протестна нота до Хрватска поради, како што објавија српските медиуми, „најгрубото мешање во изборниот процес во Србија, како и сè почестото пристрасно известување за внатрешнополитичката состојба во Србија“.

Српската дипломатија изрази силно противење на наводните обиди за влијание врз политичките процеси во Србија, особено за време на изборната кампања.

Белград  смета дека секој облик на странско мешање во внатрешнополитичките прашања е неприфатлив, без разлика дали станува збор за директно влијание врз изборните активности или за индиректно дејство што може да влијае на политичкиот натпревар, пренесе Индекс.

Начинот на кој се известува за политичките настани во Србија во Хрватска е истакнат како посебна причина за реакцијата на српското Министерство за надворешни работи. Во реакцијата се наведува дека во последните два месеци, од 15 август до 15 октомври, се евидентирани вкупно 6.282 медиумски извештаи и публикации во кои се споменува Александар Вучиќ.

Белград изразува загриженост поради „едностраното и крајно негативно претставување на внатрешната состојба во Србија“, како и обидот политичките процеси во таа земја да се прикажат како наводна закана за стабилноста на целиот регион.

Србија смета дека таквото претставување на политичките настани не придонесува за градење меѓусебна доверба или за подобрување на добрососедските односи.

Во протестната нота се истакнува и потребата од почитување на внатрешните политички процеси во Србија, без надворешни притисоци и обиди за влијание врз изборната кампања.

Српската страна заклучува дека меѓусебното почитување и конструктивниот дијалог се неопходни за односите меѓу двете земји и дека едностраните пристапи и поврзувањето на внатрешнополитичките прашања со регионалната нестабилност можат дополнително да ја поткопаат довербата.

Парламентарните избори во Србија се одржуваат на 25 октомври.