КУПУВАЊЕТО МАСЛО ЗА ГОТВЕЊЕ НЕКОГАШ БЕШЕ НАЈЛЕСНАТА РАБОТА Kои масла ви се потребни во кујната?
Социјалните мрежи ги прогласија маслата од семки за токсични, маслиновото масло сè уште чини цело богатство, а изборот пред полиците во супермаркетите никогаш не бил покомплициран. Индепендент ги одвојува фактите од заблудите и објаснува за кои масла навистина вреди да се трошат пари.
Некогаш купувањето масло за готвење беше една од најмалку важните ставки во неделната набавка. Сега, зависно од тоа на кој дел од социјалните мрежи ќе наидете, изгледа дека треба добро да размислите пред да ставите шише во количката.
Тик-Ток неодамна ги претвори маслата од семки – сончогледовото, маслото од репка, маслото од семки од грозје и нивните сродни производи – во нутритивни негативци, обвинувајќи ги за сè, од воспаленија и дебелина до хронични заболувања. Најжестоките критичари дури ги ставија во заедничка група под прилично драматичната ознака „омразените осум“.
Но, паниката на социјалните мрежи не издржува баш најдобро кога ќе се соочи со фактите. Незаситените масла – меѓу кои се маслиновото, маслото од репка и сончогледовото – генерално сè уште се подобар избор од маслата богати со заситени масти, како путерот, ги и кокосовото масло. И нема докази дека консумирањето масла од семки во рамките на нормалната исхрана предизвикува воспаление.
Значи, толку. Паниката е завршена. За жал, токму во моментот кога интернетот одлучи дека кон најевтините масла за готвење треба да се однесуваме со сомнеж, маслиновото масло стана болно скапо.
Некаде меѓу пандемијата, две катастрофални жетви во Шпанија и моментот кога супермаркетите почнаа да ставаат заштитни ознаки на шишињата, неговата цена стана речиси како да купувате мал домашен апарат. Сепак, ситуацијата се подобрува. Многу подобрата жетва во Шпанија, најголемиот производител на маслиново масло во светот, ги намали цените на големо. Компанијата „Филипо Берио“ соопшти дека нејзината продажба во Велика Британија минатата година пораснала за 37 отсто, откако цените се намалиле.
Сепак, никој што стои пред полицата со масла нема да помисли дека сме се вратиле во старите добри времиња. Истото шише од литар екстра девствено маслиново масло кое во 2022 година чинело 3,75 фунти (околу 4,38 евра), а денес чини 7,75 фунти (околу 9,05 евра). Литар растително масло, пак, чини 1,49 фунти (околу 1,74 евра). И тука се поставува прашањето зошто некој би го користел скапото масло за сè, па дури и би го истурил без размислување врз зеленчукот пред да го стави во рерна.
Изборот на масло за готвење стана неочекувано комплицирана работа.