📽️ ПРОМАШИ ПЕНАЛ, ПА ГО СРУШИ ВЕЧНИОТ РЕКОРД НА КЛОСЕ Меси стана најдобар стрелец во историјата на Светските првенства

Лионел Меси повторно испиша историја и уште еднаш потврди зошто важи за еден од најголемите фудбалери на сите времиња. Со два гола во победата на Аргентина над Австрија од 2:1 во рамки на Светското првенство, аргентинската суперѕвезда стана најдобар стрелец во историјата на мундијалите.

На култниот стадион „АТ&Т“ во Далас, Меси стигна до бројката од 17 погодоци на светските шампионати и го надмина легендарниот германски напаѓач Мирослав Клосе, кој кариерата ја заврши со 16 голови.

Промашен пенал, па историски погодок

Натпреварот за Аргентина не започна идеално. Во деветтата минута беше досуден пенал, но Меси не успеа да го реализира и топката заврши покрај голот на австрискиот чувар на мрежата Александер Шлагер.

Со тоа Аргентинецот стана и рекордер по бројот на промашени пенали на светските првенства.

Сепак, во 38-та минута следуваше моментот што ќе остане запишан во историјата. По одлична акција на Аргентина, Факундо Медина испрати повратна топка, Тијаго Алмада мајсторски ја пропушти, а Меси со прецизен удар ја затресе мрежата за 1:0 и нов светски рекорд.

На трибините во Далас следуваше ерупција од воодушевување, а аргентинските навивачи ја пееја легендарната химна „Muchachos“.

Историски ден за Аргентина

Рекордот беше поставен на 22 јуни, датум што има посебно значење за аргентинскиот фудбал. Токму на овој ден пред 40 години, легендарниот Диего Марадона против Англија ги постигна „Голот на векот“ и контроверзната „Божја рака“.

Сега, четири децении подоцна, уште еден аргентински фудбалски великан ја одбележа историјата на истиот датум.

Иако има 39 години и веќе неколку сезони настапува во американската МЛС лига, Меси на првите два натпревари на Светското првенство постигна четири гола и уште еднаш покажа дека неговата класа е безвременска.

Вечна листа на стрелци на Светските првенства

 

History is made.

Lionel Messi is the all-time top goalscorer in @FIFAWorldCup history! 🤩🇦🇷 pic.twitter.com/iv8Oelxic2

— FIFA (@FIFAcom) June 22, 2026

Лионел Меси – 17 голови,

Мирослав Клосе – 16,

Роналдо Назарио – 15,

Килијан Мбапе – 14,

Герд Милер – 14,

Жист Фонтен – 13,

Пеле – 12.