НОВИ ПРАВИЛА ЗА ВОЗАЧКИТЕ ДОЗВОЛИ И ЗА ВОЗАЧИТЕ ВО ЕУ Земјите-членки имаат 3 години да се усогласат со нив

Европскиот парламент и изгласа новите правила за возачки дозволи што ќе важат низ целата Европска Унија. Реформата носи дигитални возачки дозволи, построги правила за прекршителите на сообраќајните правила и пониска старосна граница за професионалните возачи, сето тоа со цел зголемување на безбедноста на патиштата и обединување на прописите. Целосната имплементација се очекува постепено, а клучните промени ќе стапат на сила од 2028 до 2030 година.

Една од најважните новини е тоа што забраната за управување со возило издадена во една земја-членка ќе важи низ целата Европска Унија. Ова е за да се стави крај на практиката возачите чија дозвола е одземена во една земја да продолжат да возат во други.

Но, казните што не вклучуваат забрана за возење сè уште остануваат под надлежност на државата каде што е извршен прекршокот, а воведувањето на единствен европски систем на казнени поени е напуштено.

Новите мерки беа усвоени поради загрижувачката статистика според која околу 20.000 луѓе годишно ги губат животите на патиштата на Европската Унија.

Со новите правила се воведува дигитална возачка дозвола, која ќе биде достапна на паметен телефон. Ќе функционира слично на дигиталните банкарски картички или лични карти.

Новина е и тоа што возачите со положена Б категорија ќе можат да возат возила со тежина до 4,25 тони, но тоа ќе може да се направи по дополнителна обука или да се положи посебен испит.

За да се ублажи недостигот на работна сила во транспортниот сектор, Европската унија ја намалува старосната граница за професионалните возачи. Возачите на камиони ќе можат да станат 18-годишници наместо сегашните 21 година, додека старосната граница за возачите на автобуси ќе се намали од 24 на 21 година. Притоа се воведува и  задолжителен пробен период од најмалку 2 години.

Исто така, се воведува можност за возење со придружба за 17-годишниците во сите земји-членки, што има за цел да се осигури дека тие ќе стекнат искуство во побезбедни услови. Пред полагањето на возачкиот испит, задолжително ќе биде лекарски преглед или пополнување формулар за самооценување на здравствената состојба.

Возачките дозволи ќе важат 15 години во иднина, а по тој период земјите-членки можат, но не се обврзани, да побараат нов лекарски преглед.

Иако е постигнат политички договор, земјите-членки сега имаат 3 години да ги усогласат своите национални закони со новите правила, по што следи дополнителна година транзиција. Се очекува промените поврзани со професионалните возачи да стапат во сила до 2028 година, додека дигиталната возачка дозвола треба да биде целосно достапна до 2030 година.