НАПАДОТ НА ИРАН Е НЕИЗБЕЖЕН И СЕ ОЧЕКУВА НАСКОРО? Амбасадата на САД се евакуира од Израел, британската од Иран

Американскиот Стејт департмент денеска објави дека почнал евакуација на неоперативниот персонал на амбасадата во Израел и на членовите на нивните семејства, поради „безбедносни ризици“ во услови на растечки тензии со Иран.

Одлуката сигнализира дека заедничката американско-израелска воена операција против Иран може да биде неизбежна и би можела да почне наскоро, пишува американскиот портал Аксиос. Во тој случај, Иран би можел да лансира балистички ракети кон Израел и кон американски цели во регионот.

Порано оваа недела, САД го евакуираа целиот неоперативен персонал и членовите на нивните семејства од амбасадата во Бејрут. Нападите врз Иран би можеле да предизвикаат војна меѓу Израел и Хезболах, кој дејствува во Либан.

Заминете додека има комерцијални летови

„Лицата треба да размислат за напуштање на Израел додека сè уште се достапни комерцијални летови“, соопшти Стејт департментот.

On February 27, 2026, the Department of State authorized the departure of non-emergency U.S. government personnel and family members of U.S. government personnel from Mission Israel due to safety risks.

In response to security incidents and without advance notice, the U.S.… pic.twitter.com/aWzX6Gk36x

— U.S. Embassy Jerusalem (@usembassyjlm) February 27, 2026

Американскиот амбасадор Мајк Хакаби напиша во порака до вработените во амбасадата дека секој што сака да ја напушти земјата треба да го стори тоа денеска.

Евакуацијата се однесува само на неоперативниот персонал, а амбасадата продолжува да работи. Амбасадорот, дипломатите и американскиот персонал кои работат на помагање на американските граѓани и за безбедносни, воени, политички и разузнавачки прашања остануваат во земјата.

И Британците се предупредени да си одат од Иран

И Обединетото Кралство привремено го повлече својот дипломатски персонал од Иран поради безбедносната ситуација.

Британските претставници во соопштението велат дека амбасадата во Техеран ќе продолжи да работи од далечина по одлуката која доаѓа во време на зголемени регионални тензии. Тие ги советуваат Британците „против сите патувања во Иран“, предупредувајќи дека тие кои веќе се во земјата треба „внимателно да ги разгледаат“ ризиците од престојот.

Властите предупредија дека британските државјани и лицата со двојно британско-иранско државјанство се соочуваат со значителен ризик од апсење или од притвор, истакнувајќи дека „поседувањето британски пасош или врската со Обединетото Кралство може да биде основа за притвор од страна на иранските власти“.

Владата, исто така, предупреди дека патничкото осигурување може да не важи за оние кои патуваат и покрај официјалните совети.

Службениците предупредија на „зголемен ризик од регионални тензии“, велејќи дека секоја ескалација може да доведе до прекини во патувањето и други непредвидени последици.

Иран не дозволил контрола на нуклеарните постројки

Доверлив извештај на Меѓународната агенција за атомска енергија (МААЕ) дистрибуиран до членовите покажува дека Иран не им дозволил на претставниците на пристап до нуклеарните објекти што беа бомбардирани од САД лани, за време на 12-дневна војна меѓу Израел и Иран.

Во извештајот на МААЕ се нагласува дека Агенцијата затоа „не може да потврди дали Иран ги суспендирал сите активности поврзани со збогатување на ураниумот“, ниту да ја утврди „големината на резервите на ураниум на Иран во засегнатите објекти“.

МААЕ, исто така, изјави дека со анализа на комерцијално достапните сателитски снимки, забележала „редовна сообраќајна активност околу влезот во комплексот на тунели во Исфахан“.

Објектот Исфахан, кој се наоѓа околу 350 километри југоисточно од главниот град Техеран, е главно познат по производство на ураниумски гас што се внесува во центрифугите за збогатување и прочистување.

МААЕ наведува дека преку анализа на комерцијално достапните сателитски снимки, забележала „активност во некои од засегнатите нуклеарни објекти, вклучувајќи ги и објектите за збогатување во Натанц и Фордо“, но дека „без пристап до овие објекти, не е можно да се потврди природата и целта на тие активности“.

Трамп: Преферирам дипломатија, но се подготвуваме и за војна

Претседателот на САД, Доналд Трамп во своето обраќање за состојбата на нацијата во вторникот рече дека претпочита дипломатско решение за кризата со Иран, но во исто време презентираше аргументи за можна војна против Исламската Република.

Врховниот американски воен командант за Блискиот Исток вчера му презентираше на Трамп опции за воена акција против Иран. Тоа беше прв пат командантот на Централната команда на САД, адмирал Бред Купер, да го информира Трамп од почетокот на кризата со Иран минатиот декември.

After seen departing yesterday from Crete Naval Base in Souda Bay, Greece, the USS Gerald R. Ford (CVN-78) and several of her escorts reportedly arrived this morning off the coast of Haifa in Northern Israel, which is likely to be her final position to assist with the Defense of… pic.twitter.com/UWOPxfBfED

— OSINTdefender (@sentdefender) February 27, 2026

Во последните недели, Трамп нареди масовно зголемување на американските воени сили на Блискиот Исток. Презентацијата на Купер е уште еден знак дека одлуката за Иран би можела да се донесе многу наскоро, според Аксиос.

Контраст со „позитивните“ преговори во Женева

Сегашното воено засилување, брифинзите за претседателот и евакуацијата на амбасадата во Израел се во остра спротивност со тврдењата на американските, иранските и оманските претставници дека нуклеарните разговори во четвртокот во Женева биле „позитивни“ и дека е постигнат напредок.

• ИМА ЗНАЧИТЕЛЕН НАПРЕДОК ВО ИНДИРЕКТНИТЕ ПРЕГОВОРИ МЕЃУ САД И ИРАН Следуваат консултации во Вашингтон и во Техеран, па нова рунда разговори

Од друга страна, портпаролот на иранските вооружени сили во петокот изјави дека „секоја непромислена американска акција ќе доведе до широко распространет пожар во регионот“.

Иранците решително ќе се бранат

Тој додаде дека, во случај на каков било конфликт, американските интереси во регионот ќе бидат во домет на иранските ракети.

– Ние не бараме војни, но не се плашиме од нив и решително ќе ја браниме нашата татковина и интересите на нашиот народ – рече иранскиот бригаден генерал Аболфазл Шекарчи.

Министерот за надворешни работи на Оман, Бадр Ал Бусаиди, кој е главен посредник во преговорите меѓу САД и Иран, денеска во Вашингтон ќе одржи средба со потпретседателот Џеј Ди Венс.

И други земји повикуваат да се напушти Иран

Со зголемувањето на тензиите меѓу Иран и САД, во последните денови неколку земји ги повикаа своите граѓани да го напуштат Блискиот Исток или да не патуваат во регионот. Канада издаде предупредување во петокот, повикувајќи ги сите граѓани да го напуштат Иран, предупредувајќи дека опциите за комерцијални летови може да бидат ограничени.

Кина им советуваше на своите граѓани да избегнуваат патување во Иран и ги повика оние што се во земјата да се евакуираат што е можно поскоро поради безбедносната ситуација.

Австралиската влада им нареди на членовите на семејствата на австралиските дипломати во Израел и Либан да ги напуштат двете земји, наведувајќи ја влошената безбедносна ситуација. Исто така, понуди доброволно заминување на членовите на семејствата на дипломатите во Обединетите Арапски Емирати, Јордан и во Катар.

Други земји кои ги предупредија своите граѓани да ја избегнуваат или да ја напуштат областа се Финска, Србија, Полска, Шведска, Индија, Кипар, Сингапур, Германија и Бразил.