НАЈДОБРИТЕ СТУДЕНТИ ПО МЕДИЦИНА ПРИОРИТЕТНО ЌЕ СЕ ВРАБОТУВААТ ВО ЈАВНОТО ЗДРАВСТВО Алиу очекува забелешки за измените на Законот за здравствена заштита
Се зголемува возраста за ангажирање доктори на медицина од дефицитарни специјалности кои ќе можат да работат до навршување 70 години возрасти да ја задржат пензијата, најави министерот за здравство, Азир Алиу.
Подготвени се повеќе важни измени и дополнувања на Законот за здравствената заштита, кои се поставени на Единствениот национален електронски регистар на прописи (ЕНЕР) за сугесии и забелешки, информира Министерството за здравство.
Министерот за здравство Азир Алиу вели дека сите забелешки, мислења и сугестии ќе бидат земени предвид во финалната верзија законските измени.
– Се водиме од принципите на транспарентност и отчетност и сите конструктивни забелешки, мислења и сугестии ќе бидат земени предвид во финалната верзија на новиот предлог-закон за здравствена заштита. Од досегашната примена на законот произлезе потребата да се направат измени и дополнувања во делот на постапката за вработување здравствени работници и соработници на јавните здравствени установи, статусот на директорите, специјализациите и супспецијализациите, условите за пензионирање на здравствените работници и работа по пензионирањето, како и усогласување со други прописи – изјави министерот Алиу.
Меѓу позначајните предлог-законски измени е приоритетното вработување на најдобрите по успех дипломирани доктори на медицина на медицинските факултети во Македонија. За нив, доколку се пријават на оглас за вработување нема да се спроведува постапка за селекција на кандидат, туку тие приоритетно ќе се вработуваат во јавната здравствена установа. Во постапката за вработување, предвидено е составот на комисијата за селекција на кандидатите да го предлага стручниот колегиум на установата, за секое огласено работно место посебно. Согласно резултатите од постапката за вработување, директорот е должен да го вработи најдобро рангираниот кандидат.
– Со цел правилно планирање на потребите за специјалистичките и супспецијалистичките кадри во државата и можностите за спроведување на специјализациите и супспецијализациите, во иднина Владата, покрај програмите за државни специјализации и кофинансирани специјализации, ќе донесува и програма со која ќе се определи бројот на приватни специјализации, односно супспецијализации, соодветно на потребите за медицински кадри. Исто така, се зголемува и возраста за ангажирање искусни кадри доктори на медицина од дефицитарни специјалности/супспецијалности и искористување на нивната стекната стручност. За овие лица се овозможува од 67 години до навршување 70 години возраст со договор да бидат ангажирани во здравствени установи и да ја задржат пензијата. Ангажирањето ќе биде врз основа на согласност од Министерството за здравство и Фондот за здравственото осигурување – додава министерот Алиу.