📷 ГЕРМАНИЈА ДОНИРА ОПРЕМА ОД 600.000 ЕВРА НА МВР Модерни возила и термовизиски камери за побезбедни граници

Министерството за внатрешни работи денеска ја примило вредната донација од Сојузна Република Германија, во присуство на амбасадорката Петра Дрекслер, со што уште еднаш се потврди силното партнерство и меѓусебната доверба меѓу двете земји.

Станува збор за опрема во вредност од околу 600.000 евра, која вклучува моторни и специјални возила, термовизиски камери, компјутери и софтвери, како и уреди за проверка на документи. Според министерот за внатрешни работи, Панче Тошковски, оваа донација ќе придонесе директно за поефикасна заштита на границите, поуспешна борба против организираниот криминал, трговијата со луѓе и криумчарењето мигранти, како и за унапредување на форензичките капацитети на МВР.

– Оваа донација не е само материјален придонес, туку и порака дека Германија стои рамо до рамо со Македонија во обезбедувањето сигурност и стабилност за нашите граѓани. Преку заедничките обуки и размената на искуства градиме модерна, професионална и европска полиција – истакна Тошковски.

Министерот додаде дека со новата опрема, полицијата ќе може уште поефикасно да реагира во сите сегменти на своето работење.

– Станува збор за современи технологии кои ќе ги унапредат нашите капацитети, особено во контролата на границите, идентификацијата на криминални групи и борбата против криумчарењето луѓе. Нашата цел е да ги заштитиме граѓаните и да ги унапредиме институциите на државата – рече тој.

Амбасадорката Петра Дрекслер потенцираше дека Германија континуирано ја поддржува Македонија во обезбедувањето безбедност и стабилност, како и во развојот на професионалните капацитети на полицијата.

Министерот Тошковски уште еднаш изрази искрена благодарност до Сојузната полиција на Германија и до Амбасадата на Германија за континуираната поддршка, потенцирајќи дека заедничките активности ќе продолжат и во иднина за јакнење на безбедноста и институциите на земјата.