ПУТИН БИ СЕ СРЕТНАЛ СО ЗЕЛЕНСКИ ВО МОСКВА Русија ја гарантира безбедноста на украинскиот претседател

Рускиот претседател Владимир Путин е отворен за средба со украинскиот претседател Володимир Зеленски за да разговараат за војната во Украина, изјави денеска советникот за надворешна политика на Кремљ, Јуриј Ушаков.

Русија никогаш не ја исклучила таквата средба, изјави Ушаков на дописникот на државната телевизија од Кремљ, Павел Сарубин.

– Доколку Зеленски е навистина подготвен за разговори, може да дојде во Москва – рече Ушаков, додавајќи дека Путин го изјавил ова неколку пати.

Тој нагласи дека таквата средба ќе треба да биде добро подготвена и фокусирана на резултати.

– Русија ќе ја гарантира безбедноста на украинскиот претседател – додаде Ушаков.

Украина смета дека патувањето на Зеленски во Москва е невозможно од безбедносни причини.

Украинскиот министер за надворешни работи, Андриј Сибиха, претходно изјави дека Зеленски е подготвен директно да преговара за чувствителни прашања со Путин како дел од напорите за завршување на војната во Украина.

Најчувствителните прашања во потрагата по мировен договор сè уште не се решени, рече Сибиха во интервју за украинскиот портал „Европска правда“. Тоа се територијалните прашања и нуклеарната централа Запорожје, која е окупирана од Русија.

Русија бара територијални отстапки од Украина како услов за прекин на огнот, особено повлекување на украинските сили од регионите Донецк и Луганск.

Централата Запорожје, најголемата нуклеарна централа во Европа, е окупирана од руски трупи од март 2022 година, кратко по почетокот на војната.

За време на викендот, преговарачите од Украина и Русија одржаа директни разговори за прв пат по неколку месеци во Обединетите Арапски Емирати, со посредство на САД. Разговорите треба да продолжат в недела во Абу Даби.