🎥 РЕКОРДЕН БРОЈ ОД 800 ДЕДОМРАЗОВЦИ ГО РАЗВЕСЕЛИЈА ЦЕНТАРОТ НА СКОПЈЕ Дедомразовската трка 2025
Највозрасниот учесник имаше 73 години, а најмладите беа бебиња помали од една година, кои заедно со своите родители ја почувствуваа веселата новогодишна атмосфера.
На плоштадот Македонија денеска се одржа Дедомразовската трка 2025, традиционалната новогодишна улична трка во Скопје, 11. по ред, која уште еднаш го претвори центарот на градот во црвено море од дедомразовски костуми и празнично расположение.
Оваа година трката забележа рекордно учество со над 800 натпреварувачи од сите делови на Македонија. Највозрасниот учесник имаше 73 години, а најмладите беа бебиња помали од една година, кои заедно со своите родители ја почувствуваа веселата новогодишна атмосфера.
Стартот и целта традиционално беа поставени на Плоштад Македонија, додека патеката од околу 2 километри се протегаше низ центарот на градот. Трчаа професионалци, почетници, а на прошетка дојдоа и повеќе расположени лица.
Настанот, кој од година во година привлекува сè поголем интерес, повторно го задржа својот препознатлив карактер: пријателско темпо, многу насмевки и забава, фотографии и поддршка за сите учесници.
„Огромна благодарност до Здружението „Прв до врв“ и Кока-кола, кои со својата поддршка ја збогатија новогодишната еуфорија и уште еднаш покажаа дека празниците се најубави кога се споделуваат заедно“ – напиша градоначалникот на Скопје Орце Ѓорѓиевски на својот профил на Фејсбук.
