ЈА ДАВЕЛ И ЈА ТЕПАЛ СВОЈАТА БРЕМЕНА СОПРУГА Брутално семејно насилство во Скопје
Прво почнал да ѝ се обраќа на висок тон, а потоа физички ја нападнал удирајќи ја со тупаници и со шлаканици по главата и по телото. Потоа продолжил силно да ја притиска за вратот, иако знаел дека е во петтиот месец од бременост. Во еден момент ја зграбил и насилно ја фрлил во креветот, по што ѝ ја удирал главата од ивицата на креветот, соопшти Јавното обвинителство.
Јавен обвинител од Основното јавно обвинителство Скопје поведе постапка против државјанин на Република Хрватска, кој е осомничен за кривично дело – Телесна повреда од член 130 став 2 во врска со став 1 од Кривичниот законик.
„При вршење семејно насилство во домот во Скопје тој телесно ја повредил неговата сопруга. Прво почнал да ѝ се обраќа на висок тон, а потоа физички ја нападнал удирајќи ја со тупаници и со шлаканици по главата и по телото. Потоа продолжил силно да ја притиска за вратот, иако знаел дека е во петтиот месец од бременост. Во еден момент ја зграбил и насилно ја фрлил во креветот, по што ѝ ја удирал главата од ивицата на креветот. Престанал кога оштетената започнала да крвари, по што жртвата успеала да се засолни во тоалетот и да повика полиција и брза помош. Осомничениот слушнал дека повикува помош, по што го напуштил станот. Кај оштетената биле констатирани бројни повреди на главата, но и на плацентата во која е сместен плодот“, се вели во соопштението на Јавното обвинителство.
Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничениот.
Полицијата претходно соопшти дека вчера (28.8.2025) во 16.30 часот на Граничниот премин Долно Блаце, на излез од Македонија, полициски службеници го лишиле од слобода Т.К.(36) од Хрватска.
„При извршена гранична контрола констатирано било дека тој евидира со мерка „апси“ по барање од СВР Скопје, затоа што истиот ден околу 9 часот во домот на подрачјето на Центар физички ја нападнал неговата 38-годишна сопруга“, соопшти полицијата.