ТРАМП ГО КОРИСТИ ВТОРИОТ МАНДАТ ЗА БОГАТЕЊЕ Огромни инвестиции во обврзници, криптовалути и недвижности

Претседателот на САД, Доналд Трамп, инвестираше огромни суми пари во различни сектори од почетокот на неговиот втор мандат. Критичарите го обвинуваат дека ја користи својата позиција – сосема отворено – за да го зголеми своето лично богатство.

Откако беше повторно избран на функцијата претседател, Трамп постојано се соочува со обвинувања дека остварува лична добивка од претседателската позиција. Тој и неговото семејство неодамна склучија бројни зделки – од недвижнини и криптовалути, до обврзници и акции. Прашањето што се поставува е: дали постои модел што укажува на лично збогатување?

Во САД, претседателите, потпретседателите и високите функционери се обврзани според Законот за владина етика од 1978 година, донесен по скандалот Вотергејт, да ги објавуваат своите финансии годишно. Извештаите се доставуваат до Канцеларијата за владина етика (OGE) и се достапни за јавноста.

Обврзници вредни повеќе од 100 милиони долари

Според актуелните документи на „OGE“, Трамп направил повеќе од 600 финансиски трансакции и инвестирал над 100 милиони долари во корпоративни, комунални и државни обврзници од 21 јануари 2025 година. Меѓу компаниите чии обврзници ги купил се „Citigroup“, „Morgan Stanley“, „Meta“, „T-Mobile US“, „Home Depot“ и „UnitedHealth“.

На овој начин, републиканскиот претседател има акции во сектори кои би можеле да профитираат од политичките одлуки на неговата администрација, како што е, на пример, дерегулацијата на финансискиот пазар. Критичарите го гледаат ова како потенцијален судир на интереси.

Трамп како акционер

Што се однесува до акциите, нема јавна евиденција за купувања или продажби од почетокот на неговиот втор мандат. Меѓутоа, според најновиот извештај на крајот на 2024 година, Трамп имал значителни удели во Microsoft, „Blackstone“ и неговата сопствена компанија „Trump Media and Technologies Group“.

Тој, исто така, поседувал акции на технолошки и големи компании како „Amazon“, „Alphabet“, „Meta“, „Tesla“, „Berkshire Hedway“, „PepsiCo“, „JP Morgan Chase“, „Coca-Cola“ и „Pfizer“.

Трамп и необичниот договор со Nvidia

Најголемите индивидуални позиции беа во „Nvidia“, помеѓу 615.000 и 1,3 милиони долари и „Apple“, помеѓу 650.000 и 1,35 милиони долари. Двете компании се директно зависни од неговите политички одлуки.

Трамп прво целосно ѝ забрани на „Nvidia“ да продава чипови на Кина, но неодамна ја олабави оваа одлука. За возврат, „Nvidia“ мора да отстапи 15 проценти од своите приходи од Кина на владата на САД – нешто што експертите го нарекуваат невидено во историјата на САД.

Епл ослободен од нови давачки за чипови

На почетокот на август, Трамп објави тарифи до 100 проценти за увезени компјутерски чипови и полупроводници. Сепак, „Apple“ нема да биде засегнат бидејќи, според него, извршниот директор Тим Кук ветил дополнителни инвестиции во САД во вредност од 100 милијарди долари. По веста, цената на акциите на „Apple“ порасна за повеќе од четири проценти.

Договори за недвижности во арапските земји

Инвестициите во недвижности на Трамп тешко се одвојуваат од неговите државни патувања. Неговото прво големо патување во странство го однесе во Саудиска Арабија, Катар и Обединетите Арапски Емирати – токму земјите каде што неговото семејство истовремено лансира нови или проширува постојни проекти.

Во мај започна изградбата на „Trump Tower“ во Џеда, луксузен станбен комплекс со 47 ката на Црвеното Море. Семејството на Трамп, исто така, најави изградба на луксузен терен за голф во Катар „во стилот на Трамп“, како дел од проект вреден 5,5 милијарди долари, како и „Trump International Hotel and Tower“ во Дубаи – облакодер со 80 ката и највисок отворен базен во светот.

Крипто инвестициите носат милијарди

Криптовалутите стануваат сè позначаен дел од портфолиото на Трамп. Според списанието „Форбс“, само во претходните девет месеци тој заработил околу една милијарда долари од „Trump-Meme-Coin“ и удел во компанијата „World Liberty Financial“.

Во јули, неговата холдинг компанија „Trump Media and Technologies“ објави инвестиција од две милијарди долари во биткоин и други криптовалути. На овој начин, Трамп сака да се претстави како „крипто-претседател“ и силно се залага за дерегулација на секторот.

Колку Трамп всушност профитира од функцијата

Она што е особено спорно за критичарите е тоа што Трамп, за разлика од неговите претходници, не го префрли своето богатство во таканаречен „слеп фонд“ (Blind Trust). Со неговите средства управуваат неговите деца, главно Доналд Трамп Помладиот. На тој начин практично нема јасна граница меѓу приватниот бизнис и јавната функција.

Претходните претседатели, како Џими Картер, Линдон Џонсон, Роналд Реган, Бил Клинтон и Џорџ В. Буш, ги префрлија своите средства во „слеп фонд“ за да избегнат судир на интереси.

Трамп побогат од кога било

Со тоа што одбива да ги одвои личните од државните интереси, Трамп е под силни критики. Меѓутоа, неговото семејство ги отфрла обвиненијата. Неговиот син Ерик изјави за „Фајненшл тајмс“:

„Ако има семејство кое не профитирало од политиката, тоа е семејството Трамп“.

Фактот останува дека, според „Форбс“, Доналд Трамп денес има богатство од 5,5 милијарди долари – повеќе од кога било досега.