ПОЛИЦАЈЦИ ЛАЖЕЛЕ ЗА ДА ГО СПАСАТ „ПОРШЕТО“ Дисциплинска за двајца службеници од обезбедувањето на Претседателот

Двајца полициски службеници се соочуваат со дисциплинска постапка откако лажно се претставиле како полициски лица и тврделе дека луксузно возило „порше каен“, непрописно паркирано на велосипедска патека, е службено, соопшти Министерството за внатрешни работи.

Инцидентот се случил на 22 март годинава, кога полициски службеник од ОБПС Скопје постапувал по пријава за непрописно паркирано возило на улицата Орце Николов во Скопје. При пристигнување на местото, полицаецот наишол на група револтирани граѓани кои барале веднаш да се подигне возилото.

„Две лица излегоа од угостителски објект и се претставија како полициски службеници, тврдејќи дека возилото е службено. Полицаецот побара од нив веднаш да го отстранат возилото и да го паркираат правилно, но откако утврди дека тоа не е точно, нареди подигнување на возилото“, информираат од МВР.

Возилото било пренесено во депо, каде што друг полициски службеник составил записник за сторен сообраќаен прекршок, а возачот бил казнет.

Инаку автомобилот марка „порше“ што го возел Срѓан Керим кога непрописно го паркирал во Дебар Маало, всушност не било во негова сопственост, произлегува од најновото соопштение на Министерството за внатрешни работи во кое се наведува дека сопственик било лицето М.Т. (48) од Скопје.

Во меѓувреме, двете лица кои лажно се претставиле, подоцна биле идентификувани како Т.Д. и И.С., вработени во Одделението за лично обезбедување на Претседателот на Република Македонија.

„Од страна на Одделот за внатрешна контрола, криминалистички истраги и професионални стандарди е извршена проверка, по што е утврдено потешко прекршување на работниот ред и дисциплина од страна на двајцата вработени“, наведуваат од МВР.

До Одделот за дисциплински и судски постапки е поднесен предлог за утврдување дисциплинска одговорност, соопшти Министерството.

СРЃАН КЕРИМ Е ГАЗДАТА НА ЛУКСУЗНОТО „ПОРШЕ“ Еве како поранешниот амбасадор го искоментира инцидентот во Дебар Маало

ПОЛИЦИЈАТА ГО КАЗНИЛА ВОЗАЧОТ НА „ПОРШЕТО“ Ќе мора да плати за паркирањето пред кафеана во Дебар Маало

МВР ТВРДИ ДЕКА „ПОРШЕТО“ НЕ БИЛО НА ПОЛИЦАЕЦ Пајак службата чекала налог, вината е кај службеното лице, вели Герасимовски

📽 ДРАМА ВО ДЕБАР МААЛО Пајак служба одби да собере луксузно возило на полицаец, граѓаните збеснаа