ХОЛАНДИЈА ПОДГОТВУВА АРМИЈА ОД 200.000 ВОЈНИЦИ Армијата значително ќе се зголеми од сегашните 74.000 припадници

Холандското Министерство за одбрана планира да регрутира повеќе луѓе за да ги зголеми своите вооружени сили поради зголемените тензии во светот, објавија денеска холандските медиуми.

Иако првичниот план на холандското Министерство за одбрана беше да го зголеми бројот на воени лица на 100.000, извори на кои се повикува порталот „Nos.nl“ наведуваат дека желбата во Хаг е армијата да брои дури 200.000 припадници.

Според официјалните податоци, во Министерството за одбрана во моментов работат 74.000 професионални војници, цивили и резервисти.

Има околу 42.000 професионални војници, од кои пет илјади жени.

Министерот за одбрана Хајс Тајман, според порталот NL Times, сака да го следи примерот на Шведска.

Во Шведска од 17-годишниците се бара да пополнат прашалник за нивните вештини, мотивација и афинитети кога станува збор за вооружените сили, по што шведската војска контактира со некои од нив, а учеството е доброволно.

Во Холандија, воената служба сè уште е формално задолжителна, иако ниту еден млад човек не е повикан да служи од 1997 година.

Министерот Тајман рече дека се уште не размислува за воен рок, но дека не ја исклучува можноста за воведување, како што вели, „невообичаени“ мерки.

– Доколку ситуацијата во светот се влоши, би можеле да размислиме, но сè уште не – рече Тајман.