АРСОВСКА ТВРДИ ДЕКА ГО РАЗРЕШИЛА ЗАМЕНИКОТ ПРЕД 3 МЕСЕЦИ Трајановски барал канцеларија, службено возило и телефон, но не работел ни 3 минути, реагира Градот
Од Град Скопје велат дека единствениот интерес на Трајановски бил насочен кон барања за службена канцеларија, возило и телефон и дека во изминатите две години немал никаков активен ангажман во работата на градската администрација.
Александар Трајановски повеќе од три месеци не е на функцијата заменик градоначалник и затоа не може да даде оставка од функцијата, реагира Град Скопје откако Трајановски преку својот профил на Фејсбук соопшти дека поднесува оставка од позицијата заменик на градоначалничката Данела Арсовска.
„Лицето Александар Трајановски не ја извршува функцијата заменик-градоначалник на Град Скопје повеќе од три месеци. Тој беше разрешен на 19 декември 2024 година поради нарушување на угледот на Градот, неизвршување на своите задачи и отсуство на било каков придонес во работата. Поточно, ова лице нема вкупно три активни минути на својата функција. Единственото барање на ова лице за кое е свесна градската администрација е неговата желба да добие канцеларија, службено возило и службен телефон. Друга комуникација, уште помалку во смисла на активен придонес кон работата на градот ова лице немало во последните две години“, велат од Град Скопје.