„8 СЕПТЕМВРИ“ ТРЕБА ДА БИДЕ ВТОРА КЛИНИЧКА БОЛНИЦА Таравари најави смена на уште некој директор
Министерот за здравство Арбен Таравари вели дека на ГОБ „8 Септември“ треба да ѝ се дадат повеќе ингеренции.
Министерот за здравство Арбен Таравари денеска изјави дека според него, ГОБ „8 Септември“ треба да остане добар „бекап“ за клинички центар.
– Мислам дека ГОБ „8 Септември“ треба да биде втора клиничка болница во Скопје, меѓутоа треба да се дадат повеќе ингеренции. Мислам дека „8 Септември“ треба да остане како и досега, добар „бекап“ за Клинички центар – нагласи министерот, одговарајќи на новинарски прашања по официјалното пуштање во употреба на компресорската станица за хируршките клиники.
На прашање до кога ќе биде паузирана изградбата на нов клинички центар, тој одговори дека за 2025 нема таков план.
– За 2026 ќе зборуваме и ќе ви кажеме доколку има нешто конкретно – рече Таравари.
Одговарајќи на новинарско прашање за болницата во Штип, тој рече дека не само таа, туку сите болници биле оставени како што се. Тој изрази надеж дека по јуни ќе се почне со проект за реновирање, односно нови болници во Штип и во Кичево.
– Сега ако ви кажам одма ќе ги направиме, тоа е невозможно. Оваа година, во план ни се четири болници за да започнеме. Струмица, „Свети Еразмо“, Кичево, Штип. Овие ни се во план за оваа година и реновирање на оддели и тука на Клинички, но и на други болници – одговори тој на прашањето кога може да се очекуваат подобрени услови.
Министерот рече дека е оптимист барем таа во Струмица и „Свети Еразмо“ да бидат завршени до крајот на оваа година, а новите болници во Штип и во Кичево да бидат готови барем за две години.
На прашање за коментар за најава дека Државниот инспекторат ќе ја тужи Детската клиника, тој одговори оти нема, „ако мислат дека треба да се тужи, нека ја тужат“. Министерот рече и дека нема информации за пациенти од „Тикток“, млади луѓе кои користат по пет – шест парацетамоли, пријавени на Клиниката за токсикологија.
– Првпат ја слушам оваа информација, бидејќи, искрено, не користам „Тик-Tок“ – одговори тој на новинарско прашање.
Министерот Таравари денеска најави разрешување на уште некој директор на јавна здравствена установа.
– Ќе смениме најверојатно уште некој директор. Засега се сменети двајца директори, во „Козле“ и во Општа болница во Гостивар – одговори министерот на новинарско прашање.
Министерството за здравство на 4 февруари соопшти дека е сменета директорката на Универзитетската клиника за респираторни заболувања кај децата – „Козле“ д-р Каролина Симоновска и на нејзино место е назначена проф. д-р Катерина Бошковска.