ЕУ ЌЕ ИЗВАДИ „БАЗУКА“ АКО ТРАМП Ѝ ВОВЕДЕ ЦАРИНИ „Ќе пука“ на големите технолошки компании

Доколку американскиот претседател Доналд Трамп ги исполни своите закани и воведе царини за стоки од Европската Унија, Брисел ќе одговори со таргетирање на големите технолошки компании објави „Фајненшл тајмс“, повикувајќи се на два извора во ЕУ.

Европската комисија се обидува да го искористи својот „Инструмент против принуда“ (Anti-coercion instrument ACI) во потенцијалниот спор со Вашингтон, изјавија за медиумот две официјални лица кои имале увид во плановите.

Инструментот против принуда веќе се користеше за време на првиот мандат на Трамп, а подоцна се користеше како средство против Кина. Тој ѝ овозможува на извршната власт на ЕУ да воведе ограничувања на трговијата со услуги, доколку утврди дека некоја земја користи царини за стоки за да принуди промени во политиката.

Инструментот против принуда, колоквијално наречена „базука“ од некои официјални претставници на ЕУ во 2023 година, му дозволува на блокот широк спектар на одмазднички мерки, како што се укинување на заштитата на правата на интелектуалната сопственост или нивна комерцијална експлоатација. Тој, исто така, ѝ дозволува на ЕУ да ги блокира странските директни инвестиции или да го ограничи пристапот на пазарот за банкарските, осигурителните и за другите групи за финансиски услуги.

Трамп минатата недела се закани дека „апсолутно“ ќе воведе царини за ЕУ, наведувајќи ги мерките на Брисел против американските технолошки компании и нивниот голем трговски дефицит на стоки. Тој не даде детали за тоа кога ќе бидат усвоени мерките или дали блокот би можел да преговара за одложување, како што обезбедија Канада и Мексико.

Министрите за трговија на ЕУ во вторникот се состанаа во Варшава за да разговараат за заканите на американскиот претседател. Официјални лица информирани за разговорите зад затворени врати рекоа дека мнозинството изразиле поддршка за казнени мерки, доколку е потребно.