ПЕШЕВСКА ПОБАРА ИЗВИНУВАЊЕ ЗА ПСОВКИТЕ ОД АПАСИЕВ Мојсовска ѝ одговори дека и нивниот пратеник пцуел
Собранието е место кадешто демократски се дебатира, а не е место за удирање со чевли по говорница или пак за упатување недолични зборови кон жените и затоа барам јавно извинување од колегите од Левица за вчерашното однесување и за зборовите изустени и упатени кон нечија мајка, сопруга, ќерка, девојка, рече пратеничката Пешевска.
Пратеничката Жаклина Пешевска, која е и претседателка на Унија на жени на ВМРО-ДПМНЕ денеска побара јавно извинување од колегите од Левица за вчерашното однесување и за псовките упатени кон пратениците од ВМРО-ДПМНЕ.
– На недоличните зборови упатени кон жени, сестри, мајки, не им е местото во Собрание. Некултурно и девијантно однесување не смее да се толерира на ниедно место, а најмалку во законодавниот дом. Собранието е место кадешто демократски се дебатира, а не е место за удирање со чевли по говорница или пак за упатување недолични зборови кон жените. Барам јавно извинување од колегите од Левица за вчерашното однесување и за зборовите изустени и упатени кон нечија мајка, сопруга, ќерка, девојка – рече пратеничката Пешевска на прес-конференција во седиштето на ВМРО-ДПМНЕ.
Колеги од Левица, и вие сте нечии синови, сопрузи, татковци, момчиња, додаде таа.
– Внимавајте што ви излегува од уста! Тоа најмногу говори за вас. Срамота! – рече Пешевска.
Пратеничката од Левица, Јована Мојсовска во таканареченото извинување упати дополнителни навреди кон ВМРО-ДПМНЕ.
„Колешката Жаклина Пешевска барала извинување, затоа што во нивната арогантна уфилманост само нивните мајки и сестри се битни. Впрочем, како што и 30 години ги третираат како граѓани од втор ред сите кои не се партиски подлизурковци на нивната партија! Еве, јас ќе ѝ се извинам на колешката. Извинете што бедни крадачи на вода како Зоранчо Јованчев добиваат пратенички функции и си градат дивоградби затоа што партијата ги штити. Извинете што лик како Јованчев си ја има вработено пола фамилија во Кавадарци и што стана познат единствено како пцујач во Собранието, затоа што во два мандати како пратеник одвај 10 пати излегол на говорница. Извинете што во партијата ви смрди и труе на криминалци, багабонти и предавници. И за крај, извинете што дојдоа нова генерација во Македонија која не ви се плаши и нема да ги толерира вашите простачки дивјаци да ги пцујат нашите фамилии“, одговори Мојсовска.