СИЉАНОВСКА ДАВКОВА НА РАДЕВ МУ ГИ ПРЕНЕЛА НАШИТЕ НЕМИЛОСРДНИ АРГУМЕНТИ Мицкоски очекува да продолжи дијалогот со Софија

Очекувам дека навистина ќе бидеме добри соседи и дека до крајот на оваа година ќе можеме да го продолжиме нашиот процес на достоинствен начин, изјави денеска премиерот Христијан Мицкоски, коментирајќи ја средбата на претседателката Гордана Сиљановска Давкова со нејзиниот бугарски колега Румен Радев, што се одржа вчера во Баку.

– Ние се трудиме да градиме мостови со сите соседи. Не знам каков бил речникот на средбата, знам дека средбата поминала пријателски, во добра атмосфера. Нашите аргументи се немилосрдни. Добив информација дека тие аргументи се презентирани на таа средба. Истото она што ние го правиме со нашите стратешки партнери му е предочено на господинот Радев и очекувам дека навистина ќе бидеме добри соседи и дека ова е навистина двонасочна улица. Очекувам дека навистина до крајот на оваа година ќе можеме и ние да продолжиме со нашиот процес на достоинствен начин – рече премиерот Мицкоски.

Претседателката Сиљановска Давкова вчера се сретна со бугарскиот претседател Радев на маргините на Конференцијата за климатски промени во Баку, Азербејџан. Во разговорот кој траел еден час било разговарано за потребата од унапредување на македонско-бугарските односи, за надминување на отворените прашања меѓу двете држави, како и за можностите за продлабочување и динамизирање на билатералната соработка во повеќе области од взаемен интерес.

Сиљановска Давкова, како што посочија од незикиот кабинет, нагласила дека односите треба да се развиваат врз основа на заемно почитување, поддршка и активна соработка, што ќе придонесе за јакнење на довербата и пријателството меѓу двата народа. Бугарскиот претседател Радев укажал на потребата од брзо решавање на отворените прашања, како и на потребата од воспоставување на добри односи во сите области од заемен интерес.