📽️ 300 МИЛИОНИ ЗА 10 КИЛОМЕТРИ АВТОПАТ Обвинителството да го истражи скандалозниот проект на СДСМ и ДУИ, порача Петрушевски

Во обраќањето на денешната прес-конференција, пратеникот од ВМРО-ДПМНЕ Бране Петрушевски истакна сериозни загрижености во врска со проектот за изградба на автопатот од Скопје до Блаце. Според него, предложената траса која опфаќа само 10 километри, ќе чини дури 300 милиони евра, што тој го смета за неразумно.

– СДС и ДУИ во текот на своите седум години владеење не успеаја да изградат ниту еден автопат. Сè што правеа беа калкулации за криминал и профит на поединци – рече Петрушевски.

Тој продолжи со обвинувања за ненаменска експропријација на имоти, нагласувајќи дека одредени лица купувале земјиште пред започнувањето на проектот, што го нагласува проблемот со проектната траса.

– Очигледно е дека врвот на ДУИ и СДС сакал сериозно да профитира од експропријацијата и траса со многу тунели – истакна Петрушевски.

Петрушевски дополнително нагласи дека е информирано Јавното обвинителство и изрази очекување за активна постапка: „Народот очекува одговори дали претходната власт сакала да инкасира милиони преку блиски лица. ЈО треба да покрене постапка и да даде одговори.“

– Македонија нема 300 милиони евра за фрлање на автопат од само 10 километри. Трасата треба да се препроектира и да се добие автопат по далеку помала цена – заклучи Петрушевски.

Тој додаде дека загуба за државата нема да има никаква, ќе има само за луѓето блиски до поранешната власт кои сакале да инкасираат милиони. Според него, неприфатливо е да се трошат стотици милиони евра за проекти кои можат да чинат многу помалку.