ХАМАС ЌЕ OДГОВАРА ЗА ЗЛОСТОРСТВА ПРОТИВ ЧОВЕШТВОТО Роднини на жртвите тужат во Хаг
Ќе биде поднесена тужба до судот во Хаг против членовите на Хамас и нивните соработници за да се осигура дека ќе платат висока цена за злосторствата против човештвото што ги правеле и сѐ уште ги прават - вели еден од иницијаторите.
Околу 100 роднини на заложниците кои ги држи Хамас во Појасот Газа денеска патуваат во Хаг за да поднесат обвиненија против палестинското движење за „злосторства против човештвото“ пред Меѓународниот кривичен суд, соопшти здружението на нивните семејства.
– Тоа не е само наша приказна, ако не го запреме ова, утре тоа ќе биде приказна за целиот свет – рече Офре Бибас, чиј брат е еден од заложниците, непосредно пред да се качи на специјалниот лет за Хаг.
Хаим Рубинштајн од здружението што ги обединува семејствата на заложниците рече дека ќе биде поднесена тужба до судот во Хаг против членовите на Хамас и нивните соработници за да се осигура дека ќе платат висока цена за злосторствата против човештвото што ги правеле и сѐ уште ги прават.
Околу 250 луѓе беа киднапирани во јужен Израел за време на нападот на Хамас на 7 октомври. 130 од нив сѐ уште се во Газа, а се верува дека 29 загинале, според Израел.