ЕУ НЕМА ДА ДОЗВОЛИ ЕТНИЧКОТО ЧИСТЕЊЕ НА НАГОРНО КАРАБАХ За Азербејџан ќе следува „силен одговор“
Присилното раселување на цивилното население со воени или други средства ќе наиде на силен одговор од ЕУ - предупреди Борел.
„Европската Унија ја осудува воената операција на Азербејџан против ерменското население на Нагорно-Карабах и жали за жртвите и загубата на животи предизвикани од оваа ескалација“, рече Борел, според соопштението на ЕУ.
По повод постигнатиот договор за прекин на огнот, Борел рече дека очекува итен и целосен прекин на непријателствата и почитување на примирјето, пренесува агенцијата Армен прес.
– ЕУ го повикува Азербејџан да обезбеди итна и непречена хуманитарна помош за населението на кое му е потребна, вклучително и целосно отворање на коридорот Лачин во согласност со одлуката на Меѓународниот суд на правдата од февруари и јули 2023 година – посочи Борел и додаде дека ЕУ и нејзините земји-членки се подготвени да обезбедат итна хуманитарна помош.
Тој ги повика Ерменците од Баку и Нагорно-Карабах итно да се вклучат во сеопфатен и транспарентен дијалог.
– Азербејџан сноси одговорност да ги обезбеди правата и безбедноста на Ерменците од Карабах, вклучително и нивното право да живеат во своите домови без заплашување и дискриминација. Присилното раселување на цивилното население со воени или други средства ќе наиде на силен одговор од ЕУ – предупреди Борел.
Тој истакна дека ЕУ е подготвена да преземе соодветни мерки во случај на натамошно влошување на ситуацијата.
– ЕУ ја повторува својата поддршка за суверенитетот и територијалниот интегритет и на Азербејџан и на Ерменија. Го повикуваме Азербејџан да ја потврди својата недвосмислена посветеност на територијалниот интегритет на Ерменија, во согласност со Декларацијата од Алмати од 1991 година – рече високиот претставник на ЕУ.