ПОВЕЌЕ ОД 1.000 ДЕЦА ВО СВЕТОТ ДНЕВНО УМИРААТ ПОРАДИ ЗАГАДЕНА ВОДА Вкупно 190 милиони деца во 10 африкански земји се изложени на ризик
Според податоците на ОН, дури 2 милијарди луѓе во светот или секој четврти жител не може да смета на чиста вода.
Загадената вода за пиење и недостиг на санитарна инфраструктура ги загрозуваат животите на децата низ светот, соопшти УНИЦЕФ.
Секој ден, повеќе од 1.000 деца на возраст под 5 години умираат од болести предизвикани од загадена вода, недостиг на санитарни услови и лоша хигиена, објави УНИЦЕФ денеска во Њујорк.
Вкупно 190 милиони деца во 10 африкански земји се изложени на ризик, покажува новата анализа на организацијата. Ситуацијата е најсериозна во земјите од Западна и Централна Африка, како што се Бенин, Буркина Фасо, Камерун, Чад, Брегот на Слоновата Коска, Гвинеја, Мали, Нигер, Нигерија и Сомалија. Многу од овие земји страдаат од нестабилност и вооружени конфликти, што дополнително го отежнува пристапот на децата до чиста вода и канализација.
Среда е Светски ден на водата, а на тој ден во Њујорк започнува конференцијата на ОН – целта е да се разгледа степенот до кој може да се постигнат меѓународно договорените цели, вклучително и целта за одржлив развој на ОН за пристап до чиста вода до 2030 година, јави ДПА.
Според податоците на ОН, дури 2 милијарди луѓе во светот или секој четврти жител не може да смета на чиста вода.