ССМ до работниците: Нека не ве лажат дека во јануари треба да добиете минимална плата

Сојузот на синдикатите на Македонија (ССМ) денеска преку соопштение им укажа на работниците дека не е законски работодавачот да ги убедува дека за јануари 2021 година треба да им се исплати плата во висина на минималната плата.

Работниците, како што е наведено во соопштението, покрај работата со полн фонд на часови, биле дополнително ангажирани и за работа во празник, работеле прекувремени часови, имаат работен стаж повеќе од една година, работеле во смени, работеле ноќе и слично.

„Минимална плата е најнискиот месечен износ на основна плата која работодавачот е должен да му ја исплати на работникот за работа извршена за полно работно време. Платата е составена од основна плата, дел од плата за работна успешност и додатоци. Основната плата не може да биде пониска од минималната плата утврдена со закон“, посочуваат од ССМ.

Во соопштението е наведено дека основната плата на работникот се зголемува кога работникот работи во услови потешки од нормалните, за определено работно место, како и основната плата на работникот се зголемува по час најмалку за 35 отсто за прекувремена работа, 35 отсто за работа ноќе, 5 отсто за работа во три смени, 50 отсто работа во ден на неделен одмор.

За работа во денови на празници и неработни денови утврдени со закон, посочуваат од ССМ, работникот има право на надомест на платата што му припаѓа кога во тие денови не работи и плата за поминатите часови на работа зголемена за 50 отсто, а додатоците, меѓусебно не се исклучуваат.

„Сите заедно, работниците, синдикатите и инспекциските служби мораме да придонесеме и да спречиме работникот да биде манипулиран, потценет и недоволно платен за својот труд. Бараме фер плати утврдени со колективно договарање“, се вели во соопштението од Сојузот на синдикатите на Македонија.