Николов: Соседите бираат со каква вакцина ќе се вакцинираат, а кај нас нема никаква
Два месеци зборуваат дека обезбедиле вакцини преку КОВАКС механизмот, а не брифираат дека преку КОВАКС механизмот се снабдуваат со вакцини земјите од третиот свет, вели Николов.
Додека во најголемиот број на земји во светот се одвива вакцинација против корона, додека тамошните граѓаните имаат можност да одберат тип на вакцина, кај нас ниту трага, ниту глас од долгонајавуваните вакцини, за коишто зборуваа Венко Филипче и Зоран Заев, вели Игор Николов од ВМРО-ДПМНЕ.
Тој на пресконференција посочи дека во земјава не е обезбедена вакцина ниту за медицинските лица и ризичните групи.
– Во светот, земјите бројат колкав процент од население имаат вакцинирано и тоа на 100 илјади жители, во Македонија возрасните лица, ризичните групи и оние кои се на линијата на фронтот со ковид-19 немаат можност да се вакцинираат. На таа листа ги нема дури ни Косово, ниту Босна и Херцеговина.
На врвот на светските листи по број на вакцинирани граѓани се Израел, Обединети Арапски Емирати, Сејшели, Обединетото кралство, Србија, Бахреин, САД, Малта, Исланд, Данска.На двете светски листи и онаа на Ворлдометар и онаа на Блумберг од земјите во регионот по број на вакцинирани граѓани високо котираат Србија и Словенија. Србија е на десеттото место на светските листи! – вели тој.
Николов забележува дека кај нас само се информира дека ќе има вакцини по три механизми но сѐ уште не е дојдена ниту една.
– Ги нема ниту донираните вакцини од Бугарија, ниту донираните од Грција, а дури ниту вакцините од Србија која што ја има, но за која што регулативата на Македонија не бил подготвена целиот овој период.Два месеци зборуваат дека обезбедиле вакцини преку КОВАКС механизмот, а не брифираат дека преку КОВАКС механизмот се снабдуваат со вакцини земјите од третиот свет – вели Николов.
Тој прашува кој одлучи да го остави народот само на вакцини од КОВАКС механизмот?
– Зошто со време не се почнаа директни преговори со компаниите кои што произведуваат вакцини? Дали поважно беше да се организираат локални избори наместо да се работи на обезбедување на вакцини?Дали некој ќе сноси одговорност за ваквата погрешна стратешка одлука? Многу приказни, многу лаги, малку работа, дела нема воопшто.Сето ова граѓаните скапо го плаќаат. Незаинтересираноста, неспособноста и неработливоста, на владата на Зоран Заев се плаќа со животи по граѓаните. За ова одговорност мора да има!- вели Николов.