Бројот на хоспитализирани пациенти поради ковид-19 падна под 1.000

Вкупната бројка на пациенти позитивни и суспектни на корона вирусот кои се лекуваат на инфективните оддели во главниот град и во болниците низ земјава е 971 и има околу 400 празни болнички кревети во ковид центрите.

Во изминатите 24 часа во ковид центрите во Скопје се хоспитализрани 28 нови пациенти поради компликации од корона вирусот. Вкупно 391 лице сомнително и потврдено за ковид-19 се лекува на инфективните оддели во главниот град, а во ковид центрите во болниците низ земјава се лекуваат вкупно 580 пациенти.

Во последното деноноќие, на интерните клиники во Скопје имало 8 приеми и тоа по еден пациент бил хоспитализиран на Клиниката за гастроентерохепатологија и на Кожната клиника, двајца на Клиниката за Нефрологија и четворица во ковид центарот на Неврологија.

Во ковид центарот во ГОБ „8 Септември“ имало  11 нови приеми на пациенти. На Инфективната клиника во текот на вчерашниот ден се хоспитализирани 9 болни.

Во изминатите 24 часа дома се пуштени 35 оздравени пациенти.

Во моментов на Кожната клиника во ковид центарот се лекуваат 13 пациенти, на Клиниката за неврологија 20 болни, а на Институтот за ТБЦ се примени вкупно 24 пациенти со симптоми на корона вирусот, во ковид центарот на Клиниката за нефрологија во моментов се сместени 22 пациенти, на Клиниката за очни болести 12 пациенти, а на ОРЛ 11 болни. На Клиниката за Гастроентерохепатологија лежат 19 пациенти.

Во ГОБ „8 Септември“ има вкупно 99 болни, на Клиниката за инфективни болести лежат 130 пациенти, додека во Институтот за белодробни заболувања кај деца Козле има 41 пациент.

Бројот на приеми во изминативе денови е намален и утрово до 8 часот во Скопје имало 115 слободни места.

Во болницата во Битола се хоспитализирани 37 пациенти позитивни и суспектни на ковид-19. Во болницата во Штип се хоспитализирани 53 пациенти. На инфективното одделение во Тетово има 25 пациенти, во Велес се лекуваат 31 болен, а во Куманово 99. Во ковид центарот во Охрид има хоспитализирано 65 пациенти, во Прилеп 70, во ковид центарот во Гостивар 35, а во Струга 31 болен. Во болницата во Струмица хоспитализирани се 52 пациенти, во Кочани 23, во Кичево 10, Кавадарци 26, во  Гевгелија 18 лица, а во Дебар 5.