Брнабиќ, Кисиќ Тепавчевиќ, Кон се првите кои ја примија вакцината на „Фајзер“ (ВИДЕО)

Утрово во 10 часот, српската премиерка Ана Брнабиќ, прва во Србија ја прими вакцината на „Фајзер“ против ковид-19.

По исполнувањето на условите, земањето анамнеза и пополнување на образец, мерењето на температура, премиерката ја доби својата прва доза од вакцината.

По неа, на „жешкото столче“ седна членката на Кризниот штаб и министерка за труд Дарија Кисиќ Тепавчевиќ. Потоа вакцината ја прими и членот на Кризниот штаб, епидемиологот Предраг Кон.

– Денес е дефинитивно ден за насмевка. Конечно по 6 март, можеби за прв пат сега имаме причина да се насмееме. Ова претставува почеток на крајот на коронавирусот – изјави премиерката Ана Брнабиќ и додаде дека чувствува потреба да биде прва во Србија за да покаже со својот пример дека верува во вакцината и институциите.

За време на гостување во Српската радиотелевизија, Кисиќ Тепавчевиќ рече дека е горда што Србија успеала да ја набави вакцината меѓу првите земји во светот.

– Вакцината е веќе во нашата земја, тоа е одлична вест. Тоа е нешто што може да биде светло на крајот од тунелот на оваа долга епидемија – истакна таа.

Говорејќи за почетокот на вакцинацијата во геронтолошките центри, што треба да започне денеска во Белград и Нови Сад, а утре во Ниш, таа рече дека одлуката не е донесена ад хок.

Кисиќ Тепавчевиќ потенцираше дека лекарите се обучени и дека се подготвени да ги вакцинираат граѓаните со вакцина која, како што изјави, се покажала како безбедна и не предизвикува сериозни негативни реакции.

Денеска ќе бидат вакцинирани и првите граѓани, корисници на домовите за стари лица во Белград и Нови Сад, а од утре и во Ниш.

Освен корисниците на домовите за стари лица, вакцината во Србија први ќе ја примат и здравствени работници.

Во вторникот, 4.875 дози на вакцината Фајзер пристигнаа во Србија, а други 20.000 дози ќе пристигнат на почетокот на јануари. Со што Србија е прва земја во регионот во која е пристигната вакцината на Фајзер, преку потпишан договор за 1,8 милиони дози, кои ќе пристигнуват квартално.

Наскоро се очекува да се даде дозвола за употребата и на вакцината Спутник V, како и на кинеската вакцина.

Според српскиот претседател, „од средината на јануари ќе се оди на помасовни вакцинации“.

-Кога ќе го кажам тоа, мислам на стотици илјади, можеби дури и на милион луѓе да бидат вакцинирани до крајот на јануари, тоа е страшен успех, изјави Александар Вучиќ.