Здравство по апелот од Пановски: Матичните имаат „патека“, а ако пациентот смета дека му е загрозен животот – нека пријави!

Матичните лекари уште на почетокот на пандемијата имаат „патека“ по која треба да постапуваат доколку на пациент му се влоши состојбата или има потреба од хоспитализација. Вака одговори Министерството за здравство денеска на барање на Плусинфо откако вчера професорот Никола Пановски побара ресорот итно да донесе протоколи за лекување од ковид-19 за да се спречи прекумерна употреба на лекови и на антибиотици и за да не им се наштети дополнително на заболените од новиот вирус.

Пановски вчера објави случај на пациент од внатрешноста на кого му биле пропишани дури три антибиотика иако немало потреба од толку силна терапија. Тој предупреди на епидемија од полипрагмазија што претставува неоправдана и непотребна истовремена употреба на повеќе лекови, која може повеќе да одмогне на пациентот отколку да му помогне во битката со ковид-19.

Пановски го повика Министерството да преведе протоколи за лекување на пациенти со ковид-19 и при тоа ги посочи хрватските протоколи како пример.

– Матичните лекари и специјалистите користат терапија за третман на ковид пациенти во зависност од клиничката слика на заразениот. Не постои специфична терапија за лекување на вирусот ковид-19. Нема лек, за овој вирус чија симптоматологија е слична на грип. Третманите за лекување на пациентите се движат од терапии со кои може да се ублажат симптомите, или пак терапија како би се спречила прогресијата на болеста, или да се спречи вирусот да создаде компликација во организмот на заразениот. Пациентите со блага и лесна клиничка слика се лекуваат со антипиретици и витаминска терапија, доколку болеста не прогресира. Матичните лекари уште на почетокот на пандемијата имаат „патека“ по која треба да постапуваат доколку на пациент му се влоши состојбата или има потреба од хоспитализација. Во ковид одделенијата постојат протоколи за лекување на хоспитализирани пациенти, пациенти со тешка клиничка слика и овде станува збор за стручни насоки, направени од експерти во областа, каква терапија и во која форма треба да му се даде на пациентот кој е на болничко лекување – рекоа денеска од Здравство.

Оттаму ги повикуваат пациентите ако сметаат дека нивниот матичен лекар или специјалист ги нарушиле здравствените протоколи или го загрозиле животот на пациентот со неправилна терапија, случајот веднаш да го пријават во Државниот санитарен и здравствен инспекторат.