Андоновски: Заев повеќе нема причини да биде премиер затоа треба да даде оставка
Членот на Извршниот комитет на ВМРО-ДПМНЕ смета дека Македонија мора да биде дел од Европската Унија, но тоа ќе можат да го постигнат само политичари кои знаат како треба, политичари кои не се мафијаши, кои немаат долгови кон никого и кои ќе работат без да крадат.
ВМРО-ДПМНЕ бара оставка од премиерот Зоран Заев, бидејќи како што велат од партијата, тој вети, но излажа дека ќе даде оставка доколку не добиеме датум за преговори.
Стефан Андоновски, член на ИК на ВМРО-ДПМНЕ денеска изјави дека очекувал по неуспехот и разочарувањето на народот Заев треба да има грам морал и да си даде оставка.
– Сѐ уште под импресии од лажните прослави во владиниот авион пред две години, изгледа Владата нема намера да ја признае сопствената недоветност. Европската иднина ја доведоа до знак прашалник заради сопствената недоветност, и нивните неуспеси. Ветувањата завршуваат со разочарувања. Затоа, време е за оставка и одговорност – рече тој.
Андоновски даде аргументи зошто неговата партија бара оставка од Заев.
– Оставка затоа што Заев уште од 5-ти јули 2018-тата лаже дека сме добиле датум за почеток на преговори заради договорите за добрососедство. Затоа што се сликаше во авион лажејќи не сите нас.
Заев треба да поднесе оставка затоа што го лажеше македонскиот народ дека Договорот со Бугарија ги затвора сите прашања, а дека Бугарија ќе ни биде најдобар и најсилен поддржувач. Затоа што ги внесоа билатералните проблеми со Грција и Бугарија во договори кои се услов за отпочнување на преговори. Затоа што ги уништија позициите градени од генерации политичари, ги погазија признавањата од десетици држави. Оставка затоа што надмено и суетно ги исклучија од разговорите сите експерти, други партии и дипломати од кариера. Затоа што три години одбиваа да изградат национален консензус и македонски државни црвени линии.Оставка затоа што оваа екипа донесе три години понижувања, сменето име, прифатени секакви платформи, историја која се распродава. Овие луѓе не можат сега да глумат витези кои го бранат македонскиот идентитет. Затоа што водењето држава не е битпазарски бизнис.Оставка заради килавата патлиџан дипломатија која губи насекаде. Заради лагите на Димитров дека за македонскиот идентитет не се дискутирало, а македонскиот јазик ни бил бетон, додека Османи затворал 7-8 ново отворени прашања.Оставка и за лагата дека нема да има анекс и декларација на Договорот со Бугарија и за манипулацијата дека опозицијата е онаа која ги кочи евроинтеграциите како и за тоа што ги погазија делата на Димитрија Чуповски, Ѓорѓија Пулевски, Гоце Делчев, Крсте Петков Мисирков, Цар Самуил, браќата Кирил и Методиј и браќата Миладиновци. Без никој да знае се договорија да ги распродадат. И конечно оставка затоа што добивме ем национални понижувања, ем вето за ЕУ – рече Андоновски.
Тој додаде дека блокадата веќе не е „во главата на вмровците“.
– Заев нè удри во ѕидот. Оваа Влада покажа дека е неука за историските теми, арогантна и неспособна да ги сочува јазичните прашања, своето малцинство во светот, и своето име. Во последните три години, Заев и Димитров ги потрошија најсилните аргументи и позиции на Македонија. Заев и Димитров нè оставија со идентитетски проблеми кај соседите и блокада еднаква на онаа од пред 12 години од Букурешт – рече Андоновски.
Според него, Македонија мора да биде дел од Европската Унија, но тоа ќе можат да го постигнат само политичари кои знаат како треба, политичари кои не се мафијаши, кои немаат долгови кон никого и кои ќе работат без да крадат.
– Затоа, време е да заминат Димитров, Османи, а најмногу Зоран Заев. Македонија мора да го избегне амбисот и да зачекори кон интеграција, реформи, напредок и зачувување на македонскиот национален идентитет – рече Андоновски.