Експлозијата во Бејрут слушната и на Кипар, повредена и кипарската амбасадорка
Грција и Кипар изразија жалење и сочувство до Владата на Либан по експлозијата и понудија помош доколку е потребно, додека, пак, според кипарските медиуми повредени се три Кипранки, предизвикана е штета на амбасадата на Кипар во Бејрут, а експлозијата била почувствувана и на островот, јави дописничката на МИА од Атина.
Министерството за надворешни работи на Грција, преку соопштение, доцна синоќа изрази сочувство до Владата и народот во Либан и истакна дека земјата „е подготвена да им помогне на либанските власти со сите средства што ги има на располагање“.
Подготвеност за помош и сочувство изрази и грчкиот премиер Кирјакос Мицотакис преку неговиот официјален профил на Твитер.
„Во име на грчкиот народ, сакам да изразам најдлабоко сочувство до народот во Либан, особено до семејствата кои претрпеа загуби и им посакувам брзо закрепнување на повредените. Нашите мисли се со вас. Грција е подготвена да ја обезбеди потребната помош“, напиша Мицотакис.
Заменик-министерот за цивилна заштита на Грција Никос Хардаљас преку Твитер соопшти дека контактирале со одделот на ЕУ за цивилна заштита и изразиле подготвеност за помош, додека пак градоначалникот на Атина Костас Бакојанис рече дека се во контакт со општина Бејрут за да понудат помош бидејќи „вистинските пријателства се покажуваат кога е тешко“.
Силната експлозија била почувствувана и на Кипар, а според кипарските медиуми, нанесена е штета на кипарската амбасада во Бејрут и повредени се три кипарски државјанки.
Претседателот на кипарската заедница во Либан, како што пренесуваат медиумите од островот, говорејќи за државното радио рекол дека полесно се повредени три жени меѓу кои и вршителката на должност во амбасадата на Кипар во Бејрут.
Според истите информации, во Бејрут живеат околу 2.000 кипарски државјани.
Претседателот на Кипар Никос Анастасиадис и шефот на кипарската дипломатија Никос Христодулидис преку нивните официјални „Твитер“ профили изразија подготвеност за каква било неопходна помош.