ВМРО-ДПМНЕ од утре ќе ги прашува граѓаните за нивните проблеми и ќе нуди решенија

ВМРО-ДПМНЕ од утре почнува со иницијатива „Вашите проблеми, заеднички до решенија: ЗАТОА ШТО ЈА САКАМ МАКЕДОНИЈА“ со која граѓаните преку електронска пошта, која ќе биде официјално достапна ќе им пишуваат за своите проблеми, мислења и предлози.

Сите иницијативни што ќе пристигнат во партијата внимателно ќе ги разгледаат, анализираат со комисиите и експертите и ќе понудат решенија пред институциите со можност да бидат имплементирани.

-Тука сме да разговараме и помагаме, да доаѓаме до решенија за сите работи кои го мачат обичниот човек. А тоа го правиме меѓудругото зошто мора да ја смениме и сликата за политичарите во Македонија, а народот да знае дека тука сме да си помагаме еден со друг. Во вакви времиња на криза и кога останувањето во домовите е една од најважните препораки на експертите за здравје, народот мора да биде слушнат, а за нас како партија блискоста со народот ни е исклучително важна – рече денеска на прес конференција Владо Мисајловски, потпретседател на ВМРО-ДПМНЕ.

На новинарско прашање околу најавата на лидерот на СДСМ, Зоран Заев, дека избори би можеле да се одржат најрано во јуни, како и за повикот на СДСМ, ВМРО да се откажат од годишното финансирање, Мисајловски рече:

– Неколку пати сме го одговориле ова, но изборите за нас не се главна тема, се разбира прва и единствена тема е здравјето на граѓаните. Затоа ВМРО-ДПМНЕ е подготвено кога и да има избори, но во овој момент не размислуваме на такви работи, размислуваме како да помогнеме на државата, нацијата и граѓаните.