ВУЧИЌ ЌЕ ЗБОРУВА ЗА ИЗБОРНАТА НОЌ ВО СОБРАНИЕТО „Интересно е да се чуе кој навистина сакал граѓанска војна“

Утре следете го Народното собрание. Ќе биде интересно да се слушне вистинската вистина – кој што направил, кој сакал да предизвика граѓанска војна и како јас спречив конфликти и граѓанска војна, зачувувајќи ја стабилноста на Србија, изјави доскорешниот српски претседател и актуелен лидер на опозицијата.

11

Лидерот на опозицијата во Србија, Александар Вучиќ, ги отфрли обвинувањата за неговото однесување во изборната ноќ и најави дека својата верзија за настаните ќе ја изнесе пред пратениците.

Во видеопорака објавена на Инстаграм, Вучиќ ги нарече невистинити тврдењата што во изминатите денови се појавија во јавноста.






Особено ги отфрли наводите дека имал намера да предизвика конфликт по затворањето на гласачките места, но дека бил спречен.

– Слушнав толку многу лаги за изборната ноќ. За сите детали ќе зборувам во Народното собрание. Но, бидете сигурни, луѓе, сè што кажаа е дрска лага – изјави Вучиќ.

Според неговите зборови, по 20 часот во изборната ноќ не добил ниту еден телефонски повик.

Тој тврди дека претходно во текот на денот разговарал единствено за инцидент во Лазаревац.

„Сам ја донесов одлуката“

Вучиќ негира и дека некој го предупредувал или се обидувал да влијае врз неговите одлуки.

– Престанете да лажете или кажете ми точно кој наводно ме предупредил за нешто – порача тој до студентите што учествуваат во блокадите.

Тој упати критики и кон Радио-телевизија Србија, обвинувајќи го јавниот сервис дека пренесува невистинити информации за неговата улога во настаните по изборите.

 

Вучиќ тврди дека самостојно решил да ги прифати изборните резултати.

Според него, за одлуката биле известени претставници на војската и полицијата, меѓу кои и 12 команданти.

Неговото тврдење дека сам ја донел одлуката да го признае изборниот пораз го повтори и во други јавни настапи по изборите.

– Јас ја донесов одлуката да ги признаам изборните резултати, бидејќи така се прави – изјави Вучиќ во неодамнешно телевизиско гостување.

Тој тогаш, исто така, ги отфрли тврдењата дека некој му се јавувал за да го убеди да го признае резултатот.

„Ќе кажам кој сакал конфликт“

Вучиќ најави дека во Собранието ќе зборува и за тоа кој, според неговите тврдења, се обидувал да предизвика судири во Србија.

– Утре следете го Народното собрание. Ќе биде интересно да се слушне вистинската вистина – кој што направил, кој сакал да предизвика граѓанска војна и како јас спречив конфликти и граѓанска војна, зачувувајќи ја стабилноста на Србија – изјави Вучиќ.

По изборите тој јавно призна дека верувал оти неговата политичка опција може да победи, но дека по поразот анализирале каде биле направени грешки во кампањата.

На крајот од обраќањето ги обвини политичките противници дека со, како што рече, невистини го прикриваат недостатокот од политичка програма.

– Да живее Србија, вистината секогаш победува – порача Вучиќ.

Поврзани содржини