ТРАМП ГИ ЗАТВОРА ВРАТИТЕ ЗА БЕГАЛЦИТЕ Годишно само 17.500 ќе бидат пуштени во САД, главно бели Јужноафриканци
Администрацијата тврди дека Африканерите се соочуваат со прогон и одземање земјиште, додека Јужна Африка ги отфрла овие тврдења.
Администрацијата на американскиот претседател Доналд Трамп планира бројот на бегалци што ќе бидат примени во САД во фискалната 2027 година да биде ограничен на 17.500, при што најголемиот дел од нив би биле Африканери, припадници на белото население во Јужна Африка, соопштија американските власти во известување до Конгресот.
Во известувањето се наведува дека Африканерите се соочуваат со ризик од одземање на земјиште и други форми на прогон, како и дека веројатно ќе се интегрираат во американското општество по пристигнувањето во САД. Јужноафриканската влада, од своја страна, постојано ги отфрла тврдењата дека белото население во земјата е прогонувано малцинство.
Со новата политика, администрацијата на Трамп значително го измени американскиот систем за прифаќање и преселување бегалци, кој со децении им овозможуваше на десетици илјади луѓе што бегаат од војни, конфликти и прогон во различни делови од светот да започнат нов живот во САД.
Во известувањето до Конгресот администрацијата наведува дека планира да потроши околу 500 милиони долари за преселување на новите бегалци во САД.
Организациите кои со години работат на преселување бегалци во САД ја критикуваат одлуката повторно да се насочи програмата главно кон Африканери од Јужна Африка, наместо кон луѓе од различни земји кои бегаат од прогон и насилство.
Американските претседатели секоја година го одредуваат максималниот број бегалци што можат да бидат примени во рамките на програмата. Историски, тие бројки се распределуваат меѓу различни географски региони, земајќи ги предвид војните, конфликтите и другите кризи што создаваат хуманитарни потреби ширум светот.
Во фискалната 2026 година, администрацијата на Трамп првично постави горна граница од 7.500 бегалци, при што бројот требаше главно да биде распределен меѓу Африканери од Јужна Африка. Во мај 2026 година, администрацијата ја зголеми квотата на 17.500, образложувајќи го тоа со „непредвидени случувања“ во Јужна Африка кои, според неа, создале вонредна бегалска ситуација.
За време на својот прв мандат, Трамп значително го намали бројот на бегалци на кои им беше одобрен прием во САД секоја година. Администрацијата на демократот Џо Бајден потоа ја прошири програмата, поставувајќи цел за прием на до 125.000 бегалци во фискалната 2025 година.