СТРАТЕШКИ КАПИТАЛНИ ОБЈЕКТИ ВО ЗДРАВСТВОТО Се градат две клинички и една општа болница и центар за рани и за гангрена

Министерството за здравство продолжува со интензивна реализација на стратешките капитални проекти кои ќе ја трансформираат здравствената инфраструктура во целата земја. Овие активности беа детално презентирани на 10-тиот состанок на секторската работна група за здравство, соопшти Министерството за здравство.

– Нашата визија е многу јасна, а тоа е достапно и квалитетно здравство за сите граѓани, дигитално поврзан систем и силна примарна здравствена заштита. Инвестицијата во инфраструктура не е само градба на ѕидови, туку инвестиција во луѓето, во системот и во иднината на нашата земја. Заедно градиме модерно и хумано здравство – вели министерот за здравство, Азир Алиу.

Меѓу приоритетните капитални проекти кои се во изградба се Клиничката болница во Штип, Општата болница во Кичево, Клиничката болница во Тетово, Центарот за рани и гангрени на ЈЗУ Специјализирана болница за геријатриска и палијативна медицина „13 Ноември” во Скопје, а во следната фаза ќе се гради нов Клинички центар во Скопје. Покрај тоа, напредуваат и проектите за хумани и социјални инвестиции, како што се уредување на условите за судски пациенти во Психијатриската болница-Скопје и Иновативен хаб во Кочани.

Паралелно со капиталните проекти, се реализираат и стратешки здравствени проекти, како што е Ургентниот центар за токсикологија, развој на ин-витро капацитети за гинекологија и засилена интензивна нега во кардиологијата.

– Модерната инфраструктура значи и дигитализација. Национални дигитални платформи, лабораториски мрежи, системски дигитални решенија и интегрирани услуги – тоа се проектите кои ќе го направат нашиот здравствен систем поблизок до секој граѓанин, без разлика каде живее во државата – рече министерот Алиу.