📽️ СТРАШНИ СЦЕНИ НА ВРТЕЛЕШКА ВО САД Тинејџери предизвикале хаос, деца вриштеле, луѓе летале на сите страни
Двајцата тинејџери претходно биле предупредени да не ги привлекуваат висечките седишта едни кон други, но не ги послушале инструкциите. Една жена била пренесена во болница, а повредени биле и најмалку две деца.
Двајца 13-годишници предизвикале опасен инцидент на вртелешка на саем во американската сојузна држава Џорџија, при што биле повредени неколку лица, меѓу кои и најмалку две деца. Според полицијата, тинејџерите не ги послушале предупредувањата да не се фаќаат за висечките седишта и да не ги привлекуваат едни кон други додека траела атракцијата. Поради тоа, како што се наведува, настанал „целосен хаос“ – посетителите неконтролирано се вртеле и се удирале едни со други.
Канцеларијата на шерифот на округот Колумбија соопштила за локалните телевизии на „CBS“ – „WRDW“ и „WKRC“ – дека двајцата 13-годишници биле предупредени пред почетокот на возењето да не се фаќаат и да не ги вртат своите седишта едно кон друго. И покрај предупредувањата, тие го направиле токму тоа, пренесуваат медиумите. Против двајцата малолетници биле поднесени кривични пријави, објави „Law&Crime“.
На видеоснимка што стана вирална, објавена на „YouTube“ и на социјалните мрежи, се гледа како вртелешката на Есенскиот саем во округот Колумбија, во градот Гровтаун, неконтролирано се врти, додека патниците панично реагираат.
Кристен Марфи, мајка на две деца кои биле на вртелешката, за телевизијата „WRDW“ изјавила дека сè изгледало како „целосен хаос“ и дека се плашела направата да не се „распадне“ пред нејзините очи.
– Не знам дали некогаш повторно ќе одам на некој саем. Овие направи постојано се поставуваат и демонтираат. Дозволувате децата да ве убедат да се повозат, мислите дека тоа е добра идеја. А потоа, во следниот момент, се случува вакво нешто – рекла Марфи.
Новинарката на телевизијата „WRDW“, Мередит Андерсон, во саботата на „Facebook“ објавила дека една жена била повредена кога се судриле висечките седишта и дека со амбулантно возило била пренесена од саемот. Телевизијата подоцна објавила дека жената сè уште била во болница.
Според медиумските извештаи, повредени биле најмалку две деца.
🚨 The Columbia County Sheriff’s Office has charged two 13 year olds following an incident at the county’s fall fair.
Deputies believe the teens intentionally grabbed onto one another while on a swing ride, despite prior warnings from staff not to do so. As the ride slowed, it became unstable, causing swings to slam together violently.
A woman was injured and taken from the fairgrounds in an ambulance, while two children were treated for minor injuries.
#ColumbiaCounty #FairSafety #PublicSafety #CrimeNews #GeorgiaNews
— Amy Leigh (@IAmyLeigh) November 8, 2026
На снимката се гледа вртелешка што ги врти патниците во круг и почнува да забавува додека две лица на одделни висечки седишта се обидуваат да се фатат едно за друго, наведува „WRDW“. Според телевизијата, се чинело дека вртелешката станала нестабилна додека седиштата се вртеле околу централната конструкција.
Портпарол на канцеларијата на шерифот изјавил за „WRDW“ дека истражителите веруваат оти тинејџерите намерно предизвикале губење на контролата врз вртелешката. На нивните родители им била врачена документација во која биле наведени обвиненијата, по што двајцата малолетници им биле предадени на родителите.
Надлежните не соопштиле дополнителни детали за пријавите. Според „WKRC“, тинејџерите се товарат за недолично однесување на малолетници („unruly conduct“).