СПОРНА ЗАКОНСКА РЕГУЛАТИВА ВО БРИТАНИЈА Закана со затвор ако родителите не сакаат да ја финансираат промената на полот на своето дете или ако инсистирате дека човек не може да биде мачка
Предлог-законот за забрана на таканаречената конверзивна терапија, наменета за ЛГБТ-лицата, предизвика жестоки реакции во Велика Британија. Нов извештај предупредува дека формулациите се толку широко поставени што би можеле да опфатат и случаи во кои некој ќе се обиде да убеди лице кое се идентификува како „мачка“ дека всушност е човек.
Предлог-законот на британската Лабуристичка партија за забрана на конверзивните практики, би можел да доведе до апсурдни правни последици, предупредува нов извештај на британскиот тинк-тенк „Полиси ексчејнџ“. Според авторите, формулациите во предлогот се премногу широко поставени и би можеле да ја криминализираат дури и ситуацијата во која некој ќе се обиде да му објасни на човек кој се идентификува како мачка дека е човечко суштество, пишува Дејли Мејл.
Предлог-законот е наменет за забрана на практиките со кои се врши притисок врз геј и трансродовите лица да ја променат или потиснат својата сексуална ориентација или родов идентитет. Но, извештајот, во чија изработка учествувала и поранешната претседателка на британската Комисија за еднаквост и човекови права, бароницата Хариет Фокнер, предупредува дека неговиот опфат може да биде многу поширок од намерата на владата.
Според авторите, проблематична е дефиницијата за трансродов идентитет, која ги вклучува и лицата што се идентификуваат ниту како мажи ниту како жени, или не се идентификуваат исклучиво со еден од двата пола.
Тие тврдат дека ваквата формулација би можела да опфати стотици различни ознаки за родов идентитет, меѓу кои и таканаречениот „кетџендер“ (catgender). Станува збор за термин што го користат лица кои чувствуваат силна поврзаност со мачките или се идентификуваат со нив.
– Не е претерување да се каже дека според предлог-законот, некое лице би можело да се соочи со затворска казна затоа што се обидело да убеди друго лице дека всушност не е мачка – се предупредува во извештајот.