ПРИЈАВИ ПРОТИВ АМБАСАДОРИ И МИНИСТЕРОТ ЃУРИЌ Обвинителството проверува наводи за изборни неправилности

Гласањето на српските државјани во странство се најде под истрага по парламентарните избори на кои победи студентската листа. Обвинителството за организиран криминал на Србија отвори предмети по кривични пријави против амбасадорите во Словачка и во Соединетите Американски Држави, Александар Накиќ и Драган Шутановац, поради сомневања за злоупотреба на службената положба и повреда на избирачкото право.

Според соопштението на обвинителството, подоцна биле доставени уште 13 кривични пријави против повеќе српски амбасадори, со наводи за злоупотреба на службената положба, повреда на избирачкото право и спречување на одржувањето на гласањето.

Со пријавите се опфатени и српскиот министер за надворешни работи Марко Ѓуриќ, началникот на Одделението за безбедност во Генералниот секретаријат на Министерството за надворешни работи, Веско Радовиќ, како и вршителот на должноста генерален секретар во Министерството, Душан Козарев.

Обвинителството наведува дека уште на 20 октомври испратило барање до Министерството за надворешни работи и до Републичката изборна комисија за доставување информации потребни за постапувањето по случајот.

„Веднаш по приемот на наведените кривични пријави, надлежниот јавен обвинител за организиран криминал презеде итни мерки за собирање информации и побара проверки од Министерството за внатрешни работи – Службата за борба против организираниот криминал (СБПОК)“, се наведува во соопштението.

Прашањето за гласањето во странство стана особено чувствително во пресрет на предвремените парламентарни избори во Србија, одржани на 25 октомври. Според прелиминарните резултати на Републичката изборна комисија, студентската листа освоила 52,71 процент од гласовите, додека листата на Александар Вучиќ „Обединета Србија“ добила 39,17 проценти. Вучиќ вечерта по изборите го призна поразот, иако во тој момент конечните резултати сè уште не беа утврдени.

Српските државјани во странство можеле да гласаат на 93 избирачки места. Според информациите наведени во извештајот за случајот, и покрај рекордниот број пријавени гласачи од дијаспората, избирачки места не биле отворени во десетици градови во кои српските државјани претходно имале можност да го остварат своето право на глас.

Меѓу градовите во кои не било организирано гласање се наведуваат Букурешт, Софија, Солун, Ванкувер, Грац и Истанбул. Поради тоа, дел од гласачите морале да патуваат стотици, а во некои случаи и повеќе од илјада километри за да стигнат до избирачко место.

Гласањето во странство било организирано според времето во Србија, што значело дека избирачките места морале да го следат распоредот утврден според српското време, без оглед на временската зона во земјата во која се наоѓале.

Сега обвинителството треба да ги провери наводите од кривичните пријави и да утврди дали постојат основи за понатамошно постапување. Самото поднесување пријава не значи дека пријавените лица се виновни за делата што им се ставаат на товар.