ОРГАНСКИТЕ ЈАЈЦА СЕ ПОСКАПИ, НО ДАЛИ НАВИСТИНА СЕ ПОДОБРИ? Што значат ознаките на лушпата и дали повисоката цена носи и поголема хранлива вредност

Кога стоиме пред полицата со јајца, лесно е да се помисли дека поскапите, органски јајца се и поздрав избор. Но, разликата не е толку едноставна. Ознаката „органско“ пред сè кажува како се одгледувани кокошките и со каква храна се хранети, а не гарантира дека јајцето содржи значително повеќе протеини, витамини или минерали.

Кај органското производство кокошките мора да се одгледуваат според посебни правила, меѓу кои се и органска храна и пристап до отворен простор. Тоа е значајна разлика во начинот на производство, но не треба автоматски да се поистоветува со поголема хранлива вредност, пишува Индекс.хр.

На хранливиот состав на јајцето големо влијание има исхраната на кокошката. На пример, кокошки хранети со храна збогатена со омега-3 можат да несат јајца со поголема количина на овие масни киселини. Затоа, ако барате конкретна хранлива состојка, подобро е да ја погледнете декларацијата отколку само да се водите според зборот „органско“.

Има и една едноставна работа што може да се провери директно на јајцето. Првата бројка од кодот на лушпата го покажува начинот на одгледување: 0 означува органско производство, 1 слободен одгледување, 2 подно одгледување, а 3 одгледување во кафез. Значи, не е исто „органско“ и „од слободно одгледување“ – тоа се различни категории.

А дали органските јајца се поскапи со причина? Да, но повисоката цена не значи автоматски и поголема хранлива вредност. Во неа влегуваат трошоците за органската храна, условите за одгледување, просторот, производството и сертификацијата. Ако некому му се важни условите во кои се одгледуваат кокошките, органското јајце може да биде избор според тие критериуми, но ако целта е само да се добијат повеќе протеини или витамини, повисоката цена сама по себе не го гарантира тоа.

И уште нешто важно: органското не значи автоматски и побезбедно од бактерии. Органските јајца, како и останатите, може да бидат контаминирани со салмонела, па треба правилно да се чуваат и, кога е потребно, термички да се обработат. Исто така, јајца со напукната или оштетена лушпа не се препорачува да се користат.

На крајот, изборот зависи од тоа што ви е најважно – начинот на одгледување, цената или одредена хранлива состојка. Самата ознака „органско“ не е доволна за да се каже дека едно јајце е значително поздраво од друго.