📽️ НЕ БИЛО КАРПА, КИТ ИМ ЈА ПОТОПИЛ ЈАХТАТА Четворица останале сами среде океан 18 часа
Силниот удар отворил пукнатини во 16-метарската јахта „Таи Там“, а морнарите со часови се бореле со водата пред да преминат во сплав. Покрај нив била забележана група од шест до осум китови, а еден или два биле речиси долги колку јахтата.
Силен удар ја фрлил 16-метарската јахта „Таи Там“ настрана среде Јужниот Пацифик, а кога Австралијката Џема Купер погледнала преку левата страна, пред себе видела група од шест до осум китови. Еден од нив удрил во јахтата, која по повеќечасовна борба со водата на крајот потонала.
Купер била на кормилото кога одеднаш слушнала силен тресок и од ударот била исфрлена од својата позиција.
– Целиот брод беше фрлен настрана – раскажа таа за АФП.
Според екипажот, еден или два од китовите биле речиси долги колку нивната јахта. Ударот го оштетил системот за управување, отворил неколку пукнатини во трупот од фиберглас и водата почнала брзо да навлегува.
ALERT: Sperm whale pod smashed into the side of a yacht and forced the sailors to abandon ship.
The crew of a 52-foot Tai Tam was sailing in the Pacific Ocean when a rarely seen pod of sperm whales thrashed through its side.
The hit tore a massive hole in the boat’s side, and… pic.twitter.com/UO6iQG3l0x
— E X X ➠A L E R T S (@ExxAlerts) October 1, 2026
Околу половина час подоцна екипажот испратил повик за помош. Четворицата со часови ја испумпувале водата и се обидувале да го одржат бродот на површината.
Французинот Мартин Жафр, столар по професија, се обидел да ги затвори пукнатините со експандирачка пена. Во еден момент дури нурнал под јахтата за да ја провери штетата.
Новозеландските воздухопловни сили испратиле патролен авион П-8А „Посејдон“, кој ги лоцирал морнарите и помогнал во координацијата на спасувањето.
Во текот на ноќта екипажот сфатил дека „Таи Там“ повеќе не може да се спаси и преминал во сплав. Во раните утрински часови го пресекле јажето што сè уште ги поврзувало со јахтата, стравувајќи дека бродот ќе ги повлече со себе.
Од сплавот потоа гледале како „Таи Там“ исчезнува под површината на Пацификот.
Четворицата поминале околу 18 часа на море пред да бидат забележани од 143-метарскиот контејнерски брод „МВ Софрана Сурвил“. Сите успеале да се качат на бродот и биле спасени без сериозни повреди.
– Беше прекрасен, прекрасен и во исто време ужасен крај. Но, за среќа, никој не го загуби животот – рече Џереми Купер, сопругот на Џема Купер.