НАТАНЈАХУ БАРА ОД ТРАМП ДА ПОЧНЕ НАПАДИ ВРЗ ИРАН Извори од Белата куќа тврдат дека секојдневно му се јавува на телефон

Израелскиот премиер Бенјамин Нетанјаху секој ден разговара по телефон со американскиот претседател Доналд Трамп, барајќи од него да започне нова воена офанзива против Иран, објави „Фајненшл тајмс“, повикувајќи се на извори запознаени со разговорите.

„Нетанјаху му се јавува секој ден за да го поттикне да ја продолжи војната. Оние кои не сакаат војна во и надвор од Белата куќа се обидуваат да се борат против тоа“, рече еден од изворите.

Истиот извор нагласува дека регионалните лидери го повикуваат Трамп да не го ескалира конфликтот и да им даде приоритет на преговорите.

Трамп наводно ги споменал ставовите кон своите сојузници од Заливот по состанокот со катарскиот премиер Мохамед бин Абдулрахман Ал Тани, кој се обидува да посредува за дипломатски крај на конфликтот меѓу САД и Иран.

„Катар, Саудиска Арабија, ОАЕ, Бахреин, Кувајт и други би претпочитале статус кво“, напиша Трамп на мрежата Трут соушл, објаснувајќи дека во моментов дава приоритет на одржувањето на економската блокада на Иран пред започнувањето нова воена офанзива.