МАЛОЛЕТНИК НА ТРОТИНЕТ ВО ХРВАТСКА МОЖЕ СКАПО ДА ГО ЧИНИ РОДИТЕЛОТ Земјата заострува и други сообраќајни правила

Родителите во Хрватска би можеле да платат од 1.000 до 3.000 евра доколку им дозволат на деца помлади од 14 години да возат електрични тротинети. Ова е една од најстрогите мерки во предложените измени на Законот за безбедност на сообраќајот, кои ги претстави хрватскиот министер за внатрешни работи Давор Божиновиќ.

Новите правила предвидуваат и задолжителна регистрација и обележување на електричните тротинети, додека казните за неносење кацига и недозволено возење ќе изнесуваат 100 евра.

– Родителската одговорност не завршува со купувањето тротинет, туку започнува токму тогаш – предупреди Божиновиќ.

Министерот нагласи дека електричните тротинети станале дел од секојдневието, но дека нивното неодговорно користење претставува сериозна опасност.

Значително построги казни се предвидени и за нелегалните автомобилски трки, дрифтањето и опасните маневри што се снимаат за социјалните мрежи.

За ваквите прекршоци се предлагаат казни од 2.000 до 5.000 евра, затвор до 60 дена, одземање на возилото и забрана за управување.

– Популарноста на социјалните мрежи не може да биде изговор за загрозување на нечиј живот на патиштата – порача министерот.

Предложените измени предвидуваат и зголемување на казната за некористење безбедносен појас и непрописен превоз на деца, од 130 на 200 евра.

Казната за неправилно обезбеден товар што ја загрозува безбедноста ќе порасне од 30 на 300 евра. Истата сума е предвидена и за опасно паркирање што блокира улици, тротоари или пристап на итните служби.

Божиновиќ потсети дека минатата година на хрватските патишта загинале 261 лице, односно 22 повеќе отколку во 2024 година.