КРАЈНО ВРЕМЕ Е ДА СЕ ФОРМИРА ЗАЕДНИЦА НА СРПСКИ ОПШТИНИ НА КОСОВО Брнабиќ во Советот на безбедност тврдеше дека Србија нема врска со конфликтот во Бањска

Премиерката на Србија, Ана Брнабиќ на денешната полугодишна седница на Советот за безбедност на ОН за Косово  изјави дека Белград нема никаква врска со вооружениот конфликт што се случи на 24 септември во селото Бањска, додавајќи дека најрационален пристап во моментов ќе биде КФОР да ја преземе целосната одговорност за безбедноста на Србите на северот на Косово, за партиите да го вратат дијалогот и што поскоро да се одржат локални избори.

– Кризата во Косово трагично, но очекувано ескалираше на 24 септември, кога имаше вооружен конфликт меѓу група вооружени косовски Срби и полициски и паравоени формации од Приштина во селото Бањска и неговата околина.Истрагите се во тек за да се дадат сите одговори и да се разјаснат сите нејаснотии околу овие настани, вклучително и како двајца од тројцата починати Срби ги загубија животите. Одговорно тврдам дека ниту Белград, ниту безбедносните структури на Србија немале никаква врска со овој настан и подготвени сме на меѓународната заедница да и ги доставиме сите информации и докази кои се достапни денеска за да се потврди оваа изјава -рече Брнабиќ.

Според неа, настаните во Бањска, за жал, се логична последица на владеењето на стравот и теророт што, како што рече, Приштина реши да го спроведе, и покрај јасните барања на меѓународната заедница за деескалација, точно сметајќи на фактот дека мирниот отпор на српскиот народ на северот на Косово и Метохија ќе стане нешто повеќе.

– Континуирано и постојано ја изразуваме нашата загриженост за опасностите што може да произлезат од одбивањето на Приштина да ги исполни обврските преземени во дијалогот со Белград, со посредство на ЕУ, истакна Брнабиќ и претстави дека актуелната ситуација на терен е неизбежна последица на серија од повеќе од 12 еднострани акции на Приштина. Раселените Срби не можат да се вратат во Косово, а кога ќе се обидат, мажите се апсат, а жените се загрозени. Оние Срби кои останаа секојдневно живеат во страв и несигурност. Приштина суштински сака тие да си заминат и тоа јасно го покажува, бидејќи 11 отсто од српската заедница веќе си замина – нагласи премиерката на Србија.

Брнабиќ оцени дека сите претходни договори од дијалогот се брутално прекршени, а репресивните и етнички мотивираните дејствија се внимателно пресметани за да предизвикаат реакции кај Србите на северот на Косово, за подоцна да се искористат за продолжување и засилување на одмаздата и теророт.

Според неа, крајно време е да се формира ЗСО, бидејќи тоа е незаменлив елемент на кој почива спроведувањето на сите понатамошни договори.

– Целта на Србија е имплементација на сите досегашни договори, поточно на Бриселскиот договор и формирање на Заедница на српски општини согласно договорот потпишан во 2015 година. Бараме безбедност за нашиот народ – рече Брнабиќ.

Таа нагласи дека Србија се залага и цврсто верува во принципите на меѓународното владеење на правото и Повелбата на ОН, поради што ќе продолжи да повикува на целосно почитување на Резолуцијата 1244.