„ФИЛИПЧЕ ГО ФАЛИ ЗАЕВ И МУ ЈА ЧУВА ФОТЕЛЈАТА“ Владејачката ВМРО-ДПМНЕ го обвини лидерот на СДСМ дека е продолжение на поразите на Заев

Венко Филипче на отворена сцена денеска го фалеше Зоран Заев – со други зборови тој кажа дека народот треба да биде благодарен што Заев ја водеше држава, што го смени името, што ја упропасти економијата, што СДСМ стана безгласна буква преку ДУИ, Артан и Ахмети, реагираше денеска ВМРО-ДПМНЕ.

„Венко Филипче не чувствувал одговорност за модуларната болница. Кажа дека понудил оставка, а не кажа дека заеднички со Заев одлучија да продолжи да биде министер за здравство и оставката беше само блеф кој народот не ја проголта. Венко Филипче е продолжение на црнилата, криминалот, предавствата и поразите на Зоран Заев. Тој нема никаков кредибилитет. Тој е само чувар на фотелјата и продолжена рака на Зоран Заев“, соопшти ВМРО-ДПМНЕ.

По средбата во Владата со премиерот Христијан Мицкоски на новинарско прашање за работата на Зоран Заев како лидер на СДСМ и како премиер, Венко Филипче рече дека тој после повеќе порази ја донел СДСМ на власт, како и дека ја внел Македонија во НАТО со голема жртва која некој требало да ја направи.