ДИЈАНА ПЛАНИРАЛА НОВ ЖИВОТ ВО ЈУЖНА АФРИКА Принцезата сакала да се омажи со кардиохирургот Хаснат Кан и да се пресели во Кејптаун

Принцезата Дијана планирала да го напушти животот во Велика Британија и да започне одново во Јужна Африка со човекот кого го сметала за една од најголемите љубови во својот живот, кардиохирургот Хаснат Кан.

Деталот го открива нејзиниот брат Чарлс Спенсер во новите мемоари „Swan Song: Diana, My Sister“, објавени речиси три децении по трагичната смрт на Дијана. Според неговото сведоштво, таа во март 1997 година дошла кај него во Кејптаун за да провери дали тоа би можела да биде местото каде што таа и Кан ќе изградат нов живот.

Дијана дури стапила во контакт со познатиот јужноафрикански кардиохирург Кристијан Бернард, кој требало да помогне Кан да добие работно место во болница во Кејптаун. Спенсер пишува дека неговата сестра сонувала за живот далеку од британскиот двор и постојаното медиумско внимание, надевајќи се дека на другиот крај од светот би можела да најде мир.

Врската со Хаснат Кан била тајна и траела околу две години. Двајцата се запознале во 1995 година во болницата „Ројал Бромптон“ во Лондон, каде што Кан работел како кардиохирург. Дијана набргу почнала често да го посетува, а односот прераснал во романса која долго време ја чувале подалеку од очите на јавноста.

Нивната врска била толку сериозна што Дијана размислувала и за брак. Нејзиниот поранешен батлер Пол Барел подоцна тврдел дека таа дури го замолила да најде свештеник кој би можел да ги венча. Кан бил муслиман, а тој самиот подоцна идејата за брак ја опишал како нереална. Дијана, исто така, го посетила неговото семејство во Пакистан и го запознала со своите синови, Вилијам и Хари.

Кан во истрагата за смртта на Дијана во 2008 година сведочел дека двајцата размислувале за преселба во Пакистан, но тој стравувал дека како сопруг на принцезата никогаш нема да може да води нормален живот. На крајот Дијана ја прекинала врската во летото 1997 година, само неколку недели пред да загине во сообраќајната несреќа во Париз. Подоцна започнала врска со Доди ал Фајед, кој исто така загина во несреќата.

Спенсер во книгата пишува дека Дијана во последните месеци од животот била длабоко несреќна и дека нејзината посета на Кејптаун била обид да замисли поинаков живот. Нејзината приказна со Хаснат Кан е само еден од новите детали во мемоарите, кои повторно го отворија прашањето за нејзиниот брак со Чарлс, односите во кралското семејство и случувањата по нејзината смрт.