АКО САКА НЕКА ДОЈДЕ И НА ПОЛНОЌ Мицкоски е спремен да ги слушне идеите на Филипче

Малку е непристојно е преку медиуми да разговараме, но еве ќе кажам дека сум подготвен да го примам на средба претседателот на СДСМ Венко Филипче за да го образложи планот и да ги слушнеме неговите идеи.

Ова го изјави премиерот Христијан Мицкоски денеска од Штип одговарајќи на новинарски прашања.

– Ако Филипче навистина има план и желба да помогне, јас му стојам на располагање во секое време. Ако сака на полноќ, ако сака и по полноќ, не е проблем, ќе го прилагодам мојот распоред – рече Мицкоски.

И лидерот на СДСМ Венко Филипче денеска одржа прес-конференција на која ги објави темите за кои сака да разговара со премиерот.

– Системот очигледно на многу места не функционира како што треба, јавните сервиси немаат прерформанс каков што граѓаните навистина заслужуваат и за тоа вина имаме сите политички партии СДСМ, ВМРО-ДПМНЕ, ДУИ, другите политички партии на Албанците и останатите партии. Сметам дека, слушајќи го овој аларм и барањата од граѓаните, потребно е да се направи еден систем, една нова форма на политички и општествен дијалог во кој ќе се вклучат сите политички партии пред сè најголемите и секако други чинители во општеството со цел да се изготват стратешки документи врз основа на кои ќе се направи стратегија врз основа на која државата ќе функционира повеќе од една деценија, деценија и пол или две децении – многу повеќе од мандатот на која било влада и партија или коалиција која ќе ја води. Во некои области очигледно мора да знаеме каде одиме – изјави лидерот на СДСМ на денешната прес-конференција.