НОВ ИНЦИДЕНТ СО БРЗ ВОЗ ВО ШПАНИЈА Останал заглавен во тунел, патниците биле во темница и без клима
Брз воз останал заглавен во тунел во Толедо по дефект на електричното напојување, еден ден по железничката трагедија во Шпанија со најмалку 69 загинати.
Нов инцидент со брз воз ја вознемири Шпанија, само еден ден по катастрофалниот судир на два воза во близина на Урда, во кој загинаа најмалку 69 лица, а повеќе од 100 беа повредени.
Брз воз на францускиот железнички оператор „Оуиго“ останал заглавен во тунел во покраината Толедо поради дефект во електричното напојување, објави шпанскиот весник „La Razón“.
Возот сообраќал на линијата Мурсија – Ваљадолид, преку Мадрид, кога ненадејно запрел поради оштетување на контактната мрежа, од која добива електрична енергија.
Патниците останале во темница и без климатизација. За да ја заштеди преостанатата електрична енергија додека пристигнат спасувачките екипи, екипажот ги исклучил главното осветлување и системот за климатизација. Поради дефектот, во возот не можеле да се користат ниту тоалетите, а вратите не можеле да се отворат.
Еден од патниците објавил видеоснимка на социјалните мрежи, опишувајќи ја ситуацијата како „морничава шега“, особено поради трагедијата што ја потресе земјата претходниот ден. Според неговото сведоштво, во возот владеела напнатост, но патниците успеале да останат прибрани.
Од „Оуиго“ соопштиле дека за патниците што патувале кон Сеговија и Ваљадолид ќе биде организиран автобуски превоз за да го продолжат патувањето. Компанијата најавила и можност за враќање на парите за билетите, како и дополнителен надомест во висина од 200 отсто од цената на билетот за засегнатите патници.
Инцидентот се случува во момент кога Шпанија се соочува со последиците од тешката железничка несреќа кај Урда, во покраината Толедо. Во судирот меѓу брз воз на државниот оператор „Ренефе“ и воз на компанијата „Ирио“ загинаа најмалку 69 лица, а истрагата е насочена и кон дефектот на сигнално-безбедносниот систем.
Според првичните информации, проблем со системот за безбедност „LZB“ довел до запирање на повеќе возови на линијата Мадрид – Севилја. Истражителите проверуваат зошто возот на „Ренефе“ продолжил да се движи додека возот на „Ирио“ сè уште бил запрен на истата пруга. Конечната причина за несреќата сè уште не е утврдена.
Двата инцидента се одделни настани, но новиот дефект дополнително го привлече вниманието кон безбедноста и сигурноста на железничкиот сообраќај во Шпанија.