📽️ САКАЛ ДА СТИГНЕ ДО ГЕРМАНИЈА СО „BUGATTI“ ОД 3 МИЛИОНИ ЕВРА Римац откри како непознат човек го однел автомобилот
Луксузниот спортски автомобил бил украден во близина на Загреб, по што осомничениот со него поминал низ Словенија и влегол во Австрија. Во потрагата учествувале полициите на Хрватска, Словенија и Австрија.
Мате Римац објави видео во кое открива како неговиот личен „Bugatti Chiron“ исчезнал од паркингот на компанијата во Керестинец. Автомобилот бил однесен откако клучевите останале во него, а осомничениот наводно дошол во компанијата да бара работа и планирал да стигне до Германија.
Луксузниот спортски автомобил „Bugatti Chiron“, чија вредност се проценува на повеќе од три милиони евра, бил украден од паркингот на кампусот на компанијата на Мате Римац во Керестинец, Хрватска. По кражбата, автомобилот бил пронајден во Австрија, а 36-годишен хрватски државјанин бил уапсен.
Римац објави видео на „Instagram“ во кое го објасни начинот на кој автомобилот исчезнал. Снимката беше објавена откако на социјалните мрежи почнаа да се шират информации за кражбата на возилото, чија вредност надминува три милиони евра.
View this post on Instagram
Според Римац, клучевите биле оставени во автомобилот. Тој објасни дека кампусот во Керестинец нема ограда и дека вработените често ги оставаат клучевите во возилата за да можат да ги преместуваат кога е потребно. Овојпат, таквата практика ја искористило лице кое немало овластување да го управува автомобилот.
Како што раскажа Римац во видеото, 36-годишниот хрватски државјанин наводно дошол во компанијата за да бара работа. Кога го забележал темносиниот „Bugatti Chiron“ со клучевите во него, едноставно влегол во автомобилот и се оддалечил, со намера да стигне до Германија.
Вработените првично не се посомневале дека нешто не е во ред, бидејќи претпоставиле дека автомобилот го вози некој од нивните колеги. Сепак, едно од присутните лица го препознало непознатиот човек зад воланот и ја кренало тревогата.
Кражбата потоа прераснала во меѓународна полициска потрага, во која учествувале службите од Хрватска, Словенија и Австрија. Автомобилот бил пронајден во Австрија, на бензинска пумпа покрај автопатот „Pyhrn“ (А9), во близина на местото Зајерсберг, во покраината Штаерска.
Австриската полиција го уапсила 36-годишниот маж кој бил зад воланот. Според полициските информации, осомничениот ја признал кражбата за време на испрашувањето. Сепак, по налог на Јавното обвинителство во Грац, тој бил пуштен да се брани од слобода, а против него ќе биде поднесена кривична пријава.
Автомобилот му бил вратен на сопственикот. Од компанијата „Bugatti Rimac“ потврдиле дека станува збор за личниот „Bugatti Chiron“ на Мате Римац, кој е извршен директор на компанијата.
Од компанијата соопштиле дека системот за надзор и следење на возилото функционирал правилно и помогнал автомобилот брзо да биде пронајден. Во инцидентот никој не бил повреден.
Од „Bugatti Rimac“ демантирале дека осомничениот бил нивен вработен или дека бил поврзан со компанијата.